बागमती प्रदेश

काठमाडौं, २१ माघ — नेपाल कम्युनिस्ट पार्टी (एमाले) ले पार्टीका अध्यक्ष केपी शर्मा ओली लाई भावी प्रधानमन्त्रीको रूपमा अघि सार्ने निर्णय गरेको छ।

एमालेको केन्द्रीय कार्यालय, च्यासलमा आज आयोजित पत्रकार सम्मेलनमा पार्टीका उपाध्यक्ष रामबहादुर थापाले मुलुकको रक्षा र देशभक्त, लोकतान्त्रिक शक्तिहरूलाई पुनःस्थापित गर्नुपर्ने आवश्यकता भएको बताए। उनले अध्यक्ष ओलीको नाम प्रस्तावसहित पार्टी चुनावमा प्रवेश गरिएको स्पष्ट गरे।

उपाध्यक्ष थापाले भने, “देश बनाउनेहरूलाई जिताउनुपर्ने आवश्यकता छ। नेपालको आर्थिक वृद्धि भइरहेको, समृद्धिको एकीकृत खाका अनुसार काम भइरहेको अवस्थामा अनेक पक्षहरूले अघिल्लो सरकारलाई विस्थापित गर्न खोज्दा जनताले यसलाई मनन गर्ने विश्वास छ।”

थापाले सर्वोच्च अदालतले संसद् पुनःस्थापनाको मुद्दामा चाँडै फैसला दिनुपर्नेमा पनि जोड दिएका छन्।

काठमाडौं, २१ माघ – चारदिने जापान भ्रमण सकेर राष्ट्रपति रामचन्द्र पौडेल बुधबार स्वदेश फर्किएका छन्। राष्ट्रपति पौडेललाई त्रिभुवन अन्तर्राष्ट्रिय विमानस्थलको अति विशिष्ट कक्षमा उपराष्ट्रपति रामसहायप्रसाद यादव, प्रधानमन्त्री सुशीला कार्की, मन्त्रीहरू, सुरक्षा निकायका प्रमुख तथा उच्च सरकारी अधिकारीहरूले स्वागत गरेका थिए।

जापान सरकारको निमन्त्रणामा राष्ट्रपति पौडेल नेतृत्वमा नेपाली प्रतिनिधिमण्डल सोमबार जापान प्रस्थान गरेको थियो।
भ्रमणका क्रममा प्रतिनिधिमण्डलले दुई देशबीचको सम्बन्ध मजबुत बनाउने तथा व्यापार, पर्यटन र शिक्षा क्षेत्रमा सहकार्य विस्तार गर्ने विषयमा छलफल गरेको जनाइएको छ।

काठमाडौँ, २१ माघ- आसन्न फागुन २१ गते हुने निर्वाचनको स्वच्छता प्रवर्द्धन गर्ने उद्देश्यले निर्वाचन आयोग र सामाजिक सञ्जाल प्लेटफर्म टिकटकबीच समझदारी पत्रमा हस्ताक्षर भएको छ।

बुधबार आयोजित एक कार्यक्रममा आयोगका तर्फबाट सहसचिव नारायण प्रसाद भट्टराई र टिकटकका तर्फबाट श्री फेर्दोस अल मत्ताकिनले समझदारी पत्रमा हस्ताक्षर गरेका हुन्। कार्यक्रममा कार्यबाहक प्रमुख निर्वाचन आयुक्त भण्डारी, निर्वाचन आयुक्तद्वय माननीय डा. जानकी कुमारी तुलाधर र सगुन शम्शेर जबरा तथा आयोगका सचिव कृष्ण बहादुर राउतलगायत आयोगका उच्च अधिकारीहरूको उपस्थिति रहेको थियो।

समझदारीअनुसार टिकटकले नेपालमा निर्वाचनलाई स्वच्छ, मर्यादित र विश्वसनीय बनाउन सहयोग गर्नेछ। टिकटकमार्फत निर्वाचनसम्बन्धी सही सूचना प्रवाह, भ्रामक सामग्री न्यूनीकरण तथा निर्वाचन स्वच्छतासम्बन्धी सन्देश प्रवर्द्धन गरिने अपेक्षा गरिएको छ।

कार्यक्रममा कार्यबाहक प्रमुख निर्वाचन आयुक्त भण्डारीले टिकटकले पवित्र सोचका साथ नि:शुल्क रूपमा निर्वाचन सफल बनाउन सहयोग गर्न लागेको कुरा आफैंमा महत्त्वपूर्ण भएको बताए। उनले विश्वको ध्यान अहिले नेपालको निर्वाचन आयोग र निर्वाचन प्रक्रियातर्फ केन्द्रित रहेको उल्लेख गर्दै टिकटकमार्फत नेपालका निर्वाचन प्रक्रियामा सहयोग गर्ने प्रतिबद्धता अत्यन्तै सराहनीय भएको बताए।

काठमाडौं, १६ माघ- 
काठमाडौं महानगरपालिकाका तत्कालिन मेयर तथा राष्ट्रिय स्वतन्त्र पार्टी का बरिष्ट नेता बालेन्द्र शाह (बालेन ) ले शहीद दिवसको अवसरमा शहीदहरूको बलिदान स्मरण गर्दै सुशासन र भ्रष्टाचारमुक्त राज्य निर्माणका लागि एकजुट हुन आह्वान गरेका छन्।

सामाजिक सञ्जाल फेसबुकमार्फत सार्वजनिक सन्देशमा मेयर शाहले राणा शासनको अन्त्यको माग गर्दै संघर्ष गर्ने गंगालाल श्रेष्ठ, दशरथ चन्द, धर्मभक्त माथेमा र शुक्रराज शास्त्रीको तत्कालीन राज्यद्वारा क्रुरतापूर्वक हत्या गरिएको ८५ वर्ष पूरा भएको स्मरण गराएका छन्। उनका अनुसार ती शहीदहरूको बलिदानपछि दश वर्षमै राणा शासनको अन्त्य भए पनि राज्य जनताको बन्न नसकेको यथार्थ आजसम्म कायम छ।

शाहले पछिल्ला ८५ वर्षमा पटक–पटक राजनीतिक व्यवस्था परिवर्तन भए पनि सत्ताको चरित्र नफेरिएको उल्लेख गर्दै भनेका छन्, “पटक–पटक नेपाली जनता शहीद भए तर शहीदका सपना अझै पूरा हुन सकेनन्।”
उनले भदौ महिनामा भएको ‘जेनजी आन्दोलन’ स्मरण गर्दै सुशासन र भ्रष्टाचार अन्त्यको मागसहित शान्तिपूर्ण आन्दोलनमा उत्रिएका युवा तथा विद्यार्थीले समेत आफ्नो अमूल्य जीवन बलिदान दिनुपरेको उल्लेख गरेका छन्। यसप्रति गहिरो दुःख व्यक्त गर्दै उनले अब शहीदका सपना पूरा गर्ने बाटोमा देश अघि बढिरहेको दाबी गरेका छन्।

बालेन्द्र शाहका अनुसार लामो समयदेखि जरा गाडेको भ्रष्टाचारको अन्त्य गरी सुशासन कायम गर्नु, नेपाललाई आर्थिक रूपमा उन्नत मुलुक बनाउनु तथा राज्यका निकायहरूमा भएको चरम दलीयकरण अन्त्य गर्दै राज्यलाई जवाफदेही र पारदर्शी बनाउनु आजको प्रमुख दायित्व हो।

“शहीदहरूको बलिदानीलाई बेवास्ता गर्ने छुट अब हामी कसैलाई छैन,” उनले भनेका छन्, “अब समय आएको छ—शहीदका रगतलाई सम्मान गर्दै उनीहरूको सपना पूरा गर्ने।”

शहीद दिवसको अवसरमा उनले सुशासनयुक्त र भ्रष्टाचारमुक्त देश निर्माणका लागि मन, वचन र कर्मले प्रतिबद्ध हुन आग्रह गर्दै फेरि कसैले शहीद बन्नु नपरोस् भन्ने कामना व्यक्त गरेका छन्।
मेयर शाहले अन्त्यमा सम्पूर्ण ज्ञात–अज्ञात शहीदहरूप्रति भावपूर्ण श्रद्धाञ्जली तथा सम्मान व्यक्त गरेका छन्।

काठमाडौं, १५ माघ — आगामी निर्वाचनको तयारीका लागि भारत सरकारले उपलब्ध गराएको निर्वाचनसम्बन्धी सहयोगको दोस्रो खेप आज औपचारिक रूपमा नेपाल सरकारलाई हस्तान्तरण गरिएको छ।

माननीय अर्थमन्त्री श्री रामेश्वरप्रसाद खनाल र माननीय कार्यवाहक प्रमुख निर्वाचन आयुक्त श्री रामप्रसाद भण्डारीको उपस्थितिमा India in Nepal (Embassy of India, Kathmandu) का कार्यवाहक राजदूतले २५० भन्दा बढी एसयूभी तथा डबल–क्याब पिकअप सवारी साधन नेपाल सरकारलाई हस्तान्तरण गर्नुभएको हो।

नेपाल सरकारको अनुरोधका आधारमा भारत सरकारले आगामी निर्वाचनलाई लक्षित गरी सवारी साधनसहित आवश्यक अन्य सामग्रीहरू उपहारस्वरूप प्रदान गर्दै आएको छ। उक्त सहयोगले निर्वाचन व्यवस्थापन, सामग्री ढुवानी तथा निर्वाचनसम्बन्धी कार्यहरूलाई सहज बनाउने अपेक्षा गरिएको छ।

यसअघि भारत सरकारबाट उपलब्ध गराइएको सहयोगको पहिलो खेप मिति २०८२ माघ ६ गते नेपाल सरकारलाई हस्तान्तरण गरिएको थियो। सम्बन्धित निकायका अनुसार आगामी हप्ताहरूमा थप सामग्रीहरू पनि प्राप्त हुने अपेक्षा गरिएको छ।

काठमाडौं, १३ माघ – अख्तियार दुरुपयोग अनुसन्धान आयोगले यातायात व्यवस्था कार्यालय चाबहिलका १७ कर्मचारी र काठमाडौं उपत्यका ट्राफिक प्रहरी कार्यालयका ३ जनाको मोबाइल जफत गरेको छ। स्रोतका अनुसार चाबहिल कार्यालयका प्रमुख पेशलकुमार पोखरेलसहित १७ कर्मचारीको २५ थान मोबाइल जफत गरिएको हो। त्यस्तै, ट्राफिक प्रहरी असई डोरहरि नेपालसहित ३ जनाको मोबाइल नियन्त्रणमा लिइएको छ।

नेपाल ड्राइभिङ एन्ड रिकन्डिसन सेन्टर प्रालिका मेनेजर बालकृष्ण सिंहसहित ७ जनाबाट ९ थान मोबाइल पनि जफत गरिएको अख्तियारले जनाएको छ।
अनुसन्धानका क्रममा, लिखित परीक्षामा फेल भएका केही परीक्षार्थीलाई तीन महिनाको अवधि नपुग्दै पुनः परीक्षामा सहभागी गराइ पास बनाइएको भेटिएको छ।

अख्तियारले यस मिलेमतो र घुससहितको कार्यको प्रमाण पाएपछि सम्बन्धित कर्मचारी, प्रहरी र निजी संस्थासँगको संलग्नता उजागर गर्न मोबाइल र उत्तरपुस्तिका जफत गरेको हो।

स्रोतका अनुसार चाबहिलका कार्यालय प्रमुखसहित कर्मचारी, प्रहरी र सम्बन्धित निजी संस्थाबीच मिलेमतो गरी ५ हजारदेखि १० हजार रुपैयाँ लिई लाइसेन्सको लिखित परीक्षामा फेल भएका परीक्षार्थीलाई पास गराइएको आशंकामा अनुसन्धान अघि बढाइएको हो।

काठमाडौं, १३ माघ — नेपाल कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) लाई स्थापित गराउन देशी तथा विदेशी शक्तिहरूले ठूलो लगानी गरिरहेको आरोप लगाएका छन्।
मंगलबार काठमाडौंमा आयोजित चुरे भावर पार्टीसँगको एकता तथा समायोजन कार्यक्रमलाई सम्बोधन गर्दै दाहालले विचार र सिद्धान्तभन्दा ‘स्टन्ट’ का भरमा लोकप्रिय हुने प्रवृत्तिलाई बाह्य शक्तिले प्रयोग गरिरहेको दाबी गरे। उनले त्याग, तपस्या र बलिदानको राजनीतिलाई पन्छाएर केवल चर्चाका लागि गरिने गतिविधिलाई प्रवर्द्धन गर्नु मुलुकका लागि सुखद नहुने बताए।

पूर्वप्रधानमन्त्री दाहालले भने, “अहिले विचार र राजनीतिक मूल्यमान्यताभन्दा स्टन्टको भरमा लोकप्रिय हुने र त्यस्तालाई नै प्रमोट गर्न देशी–विदेशी शक्तिहरूले ठूलो लगानी गरेको हामीले देखिरहेका छौँ।”
उनका अनुसार यस्ता शक्तिहरूले भ्रष्टाचारविरुद्धको अभियान र सामाजिक न्यायका मुद्दालाई वास्तविक रूपले नभई प्रचारमुखी शैलीमा अघि बढाइरहेका छन्। यसले दीर्घकालीन रूपमा देशको राजनीतिक संस्कारमा नकारात्मक असर पार्ने उनको भनाइ थियो।

कार्यक्रममा दाहालले मुलुकमा राष्ट्रिय तागत निर्माण गरी देश र जनताको पक्षमा काम गर्न कम्युनिस्ट तथा वामपन्थी शक्तिहरूबीच एकता अपरिहार्य भएको उल्लेख गरे। इतिहासको सम्मान गर्ने र राजनीतिक मूल्यमान्यतामा आधारित आन्दोलनलाई संगठित गर्नकै लागि आफूले कम्युनिस्ट पार्टीहरूको ध्रुवीकरण प्रक्रियालाई तीव्रता दिएको पनि उनले बताए।

कम्युनिस्ट र देशभक्त शक्तिहरूको एकताले मात्रै मुलुकलाई वर्तमान संकटबाट जोगाउन सक्ने दाबी गर्दै दाहालले अन्य छरिएर रहेका राजनीतिक शक्तिहरूलाई पनि एकता प्रक्रियामा सहभागी हुन आह्वान गरे।