खेलकुद

काठमाडौं, १ कार्तिक — आगामी आईसीसी विश्वकप क्रिकेट लिग–२ अन्तर्गत संयुक्त अरब इमिरेट्स (यूएई) मा हुने त्रिकोणात्मक सिरिजका लागि १५ सदस्यीय नेपाली राष्ट्रिय क्रिकेट टोली घोषणा गरिएको छ।

**नेपाल क्रिकेट सङ्घ (क्यान)**ले शुक्रबार सार्वजनिक गरेको टोलीमा रोहित पौडेललाई कप्तान र दीपेन्द्र सिंह ऐरीलाई उपकप्तानको जिम्मेवारी दिइएको छ। नेपालले यही कात्तिक ९ देखि १९ गतेसम्म यूएईमा आयोजना हुने सिरिजमा आयोजक यूएई र अमेरिकासँग प्रतिस्पर्धा गर्नेछ।

घोषित नेपाली टोलीमा यी खेलाडीहरू रहेका छन् —
रोहित पौडेल (कप्तान), दीपेन्द्र सिंह ऐरी (उपकप्तान), सन्दीप लामिछाने, आसिफ शेख, अनिल साह, कुशल भुर्तेल, सोमपाल कामी, करण केसी, नन्दन यादव, भीम सार्की, कुशल मल्ल, आरिफ शेख, ललित राजवंशी, गुल्शन झा र शाहब आलम रहेका छन्।

काठमाडौं,२८ असोज —सन्दीप लामिछानेको शानदार बलिङ प्रदर्शनमा नेपालले आईसीसी टी–२० विश्वकप एसिया तथा इस्ट एसिया–प्यासिफिक छनोटको सुपर सिक्स चरणमा कतारमाथि ५ रनको रोमाञ्चक जित हात पारेको छ। टस हारेर पहिले ब्याटिङ गरेको नेपालले निर्धारित २० ओभरमा ९ विकेट गुमाउँदै १४७ रन बनायो। कप्तान रोहित पौडेलले उत्कृष्ट प्रदर्शन गर्दै ४१ बलमा ५८ रनको अर्धशतकीय पारी खेले। त्यसैगरी दीपेन्द्रसिंह ऐरीले २१ बलमा २६ रन र गुल्शन झाले ८ बलमा १६ रनको छिटो पारी खेले।

बलिङतर्फ कतारका कप्तान मिर्जा बेगले ४ ओभरमा २९ रन दिएर ३ विकेट लिए भने डानियल लुइसले पनि ३ विकेट हात पारे। लक्ष्य पछ्याउने क्रममा कतार १९ ओभर ५ बलमा सबै विकेट गुमाउँदै १४२ रनमै समेटियो। कतारका ओपनर इमाल लियानागेले ३५ बलमा ५५ रन र जुबेर अलीले ५२ रन बनाए। तर, अन्य ब्याटरहरूले खास प्रदर्शन गर्न नसक्दा कतार पराजित हुन पुग्यो।

नेपालका तर्फबाट सन्दीप लामिछानेले घातक बलिङ गर्दै ४ ओभरमा ५ विकेट लिए। उनले खेलको महत्वपूर्ण क्षणमा लगातार विकेट निकाल्दै नेपाललाई जितको बाटोमा फर्काए। नन्दन यादवले २ विकेट र दीपेन्द्रसिंह ऐरीले १ विकेट लिए। थप रूपमा, दीपेन्द्र र आदिलले रनआउट गर्दै खेलमा नाटकीय मोड ल्याएका थिए।

एक समय सहज जिततर्फ बढेको कतार अन्ततः नेपालको सशक्त पुनरागमनसँगै ५ रनले हार्न बाध्य भयो। यसअघि नेपालले सुपर सिक्सको पहिलो खेलमा यूएईलाई पराजित गरेको थियो। यस जितसँगै नेपाल फाइनल चरणतर्फ एक कदम नजिक पुगेको छ।

काठमाडौं, २६ असोज- आईसीसी टी–२० विश्वकप एसिया तथा इस्ट एसिया–पेसिफिक छनोटको सुपर सिक्स चरणमा नेपालले यूएईमाथि रोमाञ्चक १ रनको जित हासिल गर्दै विश्वकपमा प्रवेशको सम्भावना बलियो बनाएको छ।

काठमाडौंमा भएको खेलमा नेपालले टस जितेर पहिले ब्याटिङ गर्दै निर्धारित २० ओभरमा ६ विकेटको क्षतिमा १४० रन बनायो।
ओपनर आसिफ शेखले उत्कृष्ट अर्धशतक प्रहार गर्दै ४७ बलमा ५१ रन बनाए।
त्यस्तै कुशल भुर्तेलले २८ रन, कप्तान रोहित पौडेलले २० रन र गुल्शन झाले अन्त्यतिर ५ बलमा १४ रनको योगदान दिए।
यूएईका बलरहरू जुनेद सिद्दिकी, मुहम्मद रोहिद, जाहिद अली, ध्रुव पराशर, हर्षित कौशिक र हेदर अलीले १–१ विकेट लिए।

१४१ रनको लक्ष्य पछ्याउने क्रममा यूएईले २० ओभरमा ९ विकेट गुमाएर १३९ रन मात्रै बनाउन सक्यो।
यूएईका अलिशान सराफूले ५८ रन र ध्रुव पराशरले ३८ रनको योगदान दिए पनि टोलीलाई जित दिलाउन सकेनन्।

एक समय ८२–१ को बलियो अवस्थामा रहेको यूएईमाथि नेपालका बलरहरूले शानदार कमब्याक गरे।
दीपेन्द्र सिंह ऐरीले अन्तिम ओभरमा उत्कृष्ट बलिङ गर्दै नेपाललाई जित दिलाए। उनले ४ ओभरमा २२ रन खर्चेर ३ विकेट लिए।
सन्दीप लामिछाने, सोमपाल कामी र गुल्शन झाले पनि १–१ विकेट हात पारे।

अन्तिम ओभरमा यूएईलाई १० रन आवश्यक थियो। ध्रुव पराशरले एक छक्का प्रहार गरे पनि त्यसपछि दीपेन्द्रको बलमा क्याच आउट भए।
त्यसपछि रनआउट र शर्ट रनको कारण यूएईले बाँकी बलमा आवश्यक रन जोड्न सकेन र नेपाल १ रनले विजयी भयो।

यो जितसँगै नेपालले सुपर सिक्स चरणमा बलियो स्थिति बनाएको छ र विश्वकप टी–२० मा छनोट हुने सम्भावना अझ प्रबल भएको छ।

१६ भदौ :  नेपाल ए क्रिकेट टोलीले आसामविरुद्धको पाँच खेलको टी-२० सिरिजमा ३-२ को रोमाञ्चक जित हात पारेको छ। सोमबार भारतको गुवाहाटीमा सम्पन्न अन्तिम खेलमा नेपाल एले आसामलाई ४४ रनले पराजित गर्दै सिरिज आफ्नो पक्षमा पारेको हो।

टस जितेर पहिले ब्याटिङ गरेको नेपाल ‘ए’ले निर्धारित २० ओभरमा ६ विकेट गुमाउँदै २०८ रनको बलियो योगफल बनायो। नेपालको जितमा सन्दीप जोराले सर्वाधिक ६४ रनको योगदान दिए भने शुभ कंसाकारले ४१ रन र इशान पाण्डेले ३२ रन जोड्दै टोलीलाई ठुलो स्कोरसम्म पुर्‍याए।

२०९ रनको लक्ष्य पछ्याउने क्रममा आसामको टोली नेपाली बलरहरूको अनुशासित आक्रमण अगाडि टिक्न सकेन। आसामले निर्धारित २० ओभरमा ९ विकेट गुमाउँदै १६४ रन मात्र बनाउन सक्यो। आसामका भार्गव लहकरले सर्वाधिक २९ रनको योगदान दिए।

नेपाल एका बलरमध्ये पवन सर्राफ, शेर मल्ल र आकाश चन्दले समान २-२ विकेट हात पारे। त्यस्तै, आसामका बलर आयुष्मान मलाकार र अभिनव चौधरीले पनि समान २-२ विकेट लिएका थिए।

यस जितसँगै नेपाल ‘ए’ क्रिकेट टोलीले आसामविरुद्धको पाँच खेलको टी-२० सिरिज ३-२ ले आफ्नो पोल्टामा पार्दै भारत भ्रमणलाई सफल बनाएको छ।

जेठ ३१ ,२०८२
उत्सव खबर: दक्षिण अफ्रिकाले डिफेन्डिङ च्याम्पियन अष्ट्रेलियामाथि सानदार जित निकाल्दै पहिलो पटक विश्व टेस्ट च्याम्पियनसिप (WTC)को उपाधि जितेको छ। शनिबार लन्डनको प्रतिष्ठित लर्ड्स मैदानमा सम्पन्न फाइनल खेलको चौथो दिन, दक्षिण अफ्रिकाले २८२ रनको कठिन लक्ष्य ५ विकेटको क्षतिमा पूरा गर्दै इतिहास रच्न सफल भएको हो। यो जितसँगै दक्षिण अफ्रिकाले २७ वर्षपछि कुनै आईसीसी प्रतियोगितामा उपाधि जित्ने उपलब्धि हासिल गरेको छ। यसअघि टोलीले सन् १९९८ मा भएको आईसीसी च्याम्पियन्स ट्रफी ९त्यतिबेला मिनी वर्ल्ड कप० जितेको थियो। दक्षिण अफ्रिकाका लागि खेलको नायक बने एडेन मार्करम, जसले महत्वपूर्ण अवस्थामा संयमित ब्याटिङ गर्दै उत्कृष्ट शतक (१०३ रन) बनाए। कप्तान टेम्बा बाभुमाले पनि ४९ रनको महत्वपूर्ण योगदान दिए। बलिङतर्फ, अष्ट्रेलियाको दोस्रो इनिङ सीमित रनमा समेट्न दक्षिण अफ्रिकाका तीव्र बलरहरू केगिसो रबाडा र एनरिच नॉर्कियाले घातक प्रदर्शन गरे। खेलपछि बोल्दै कप्तान बाभुमा भावुक देखिए। उनले भने, “यो उपाधि केवल टिमका लागि मात्र होइन, सम्पूर्ण दक्षिण अफ्रिकी क्रिकेटप्रेमीहरूको लागि समर्पित छ। २७ वर्षको लामो पर्खाइ अन्त्य भएको छ।” क्रिकेट विश्लेषकहरूका अनुसार, दक्षिण अफ्रिकाको यो जितले टिमलाई अन्तर्राष्ट्रिय टेस्ट क्रिकेटमा पुनः एक शक्तिशाली दावेदारको रूपमा प्रस्तुत गरेको छ।

उत्सव खबर वीरगंज
जेठ २८, २०८२

लन्डनको ऐतिहासिक लर्ड्स क्रिकेट मैदानमा आजदेखि २०२५ को विश्व टेस्ट च्याम्पियनसिप  फाइनल खेल सुरू भएको छ। यो महत्वपूर्ण भिडन्तमा अस्ट्रेलिया र दक्षिण अफ्रिका आमनेसामने भएका छन्।

दक्षिण अफ्रिकाका कप्तान टेम्बा बावुमाले टस जितेर अस्ट्रेलियालाई ब्याटिङका लागि निम्तो दिएका छन्। अस्ट्रेलियाले पहिलो इनिङमा क्यामेरुन ग्रीन र जोश हाजलवुडलाई चोटपटकबाट फर्काएर टोलीमा समावेश गरेको छ। यसैगरी, दक्षिण अफ्रिकाले मार्को जानसेन र केशव महाराजलाई आफ्नो बलिङ आक्रमणमा समावेश गरेको छ।

अस्ट्रेलिया गत संस्करणको च्याम्पियन भएकोले यस पटक पनि उपाधि बचाउने लक्ष्यमा छ भने दक्षिण अफ्रिका पहिलो पटक फाइनलमा पुगेको हो र आफ्नो पहिलो ध्त्ऋ उपाधि जित्ने आशामा छ। यो खेल १५ जुनसम्म पाँच दिनसम्म चल्नेछ।