मुख्य समाचार

काठमाडौं, जेठ १ गते — प्रधानमन्त्री तथा मन्त्रिपरिषद् कार्यालयले अत्यावश्यक बाहेक नयाँ सामग्री खरिद नगर्न सबै सरकारी निकायलाई निर्देशन दिएको छ । सार्वजनिक खर्चमा मितव्ययीता अपनाउन भन्दै कार्यालयले मन्त्रालय, आयोग, सचिवालय, प्रदेश सरकार तथा सम्बन्धित निकायहरूलाई परिपत्र जारी गरेको हो ।

परिपत्रमा कार्यालय प्रमुखहरूलाई कार्यालयमा रहेका फर्निचर, उपकरण, सवारी साधन तथा अन्य सामग्रीहरू मर्मत गरी चालु अवस्थामा प्रयोग गर्न तथा अनावश्यक नयाँ खरिद नगर्न आग्रह गरिएको छ ।

प्रधानमन्त्री कार्यालयका अनुसार प्रयोगमा रहेका कुर्सी, सोफा, दराज, कार्पेट, पर्दा, कम्प्युटर, मोबाइल, ल्यापटपलगायत सामग्री प्रयोग नगरी नयाँ खरिद गर्ने तथा मर्मतमा अस्वाभाविक खर्च गर्ने प्रवृत्तिका कारण राज्यकोषमा अनावश्यक भार परेको गुनासो आएको थियो ।

सुशासन, भ्रष्टाचार नियन्त्रण तथा कर्मचारी पृष्ठपोषण शाखाका शाखा अधिकृत सूर्यबहादुर बस्नेतले सार्वजनिक खर्च नियन्त्रण र मितव्ययीता कायम गर्न यस्तो निर्देशन जारी गरिएको जानकारी दिए ।

ललितपुर, जेठ १ गते — ललितपुर महानगरपालिकाका विभिन्न स्थानबाट लागूऔषध कारोबारमा संलग्न रहेको आरोपमा ५ जनालाई प्रहरीले पक्राउ गरेको छ ।

जिल्ला प्रहरी परिसर ललितपुर मातहत प्रहरी वृत्त सातदोबाटोबाट खटिएको टोलीले वडा नं. २३ र २८ का विभिन्न स्थानमा विशेष सूचनाका आधारमा चेकजाँच गर्दा उनीहरूलाई नियन्त्रणमा लिएको हो ।

पक्राउ पर्नेमा चितवनका अनिल कुँवर, सुनसरीका गौतम शर्मा, ललितपुरका रोहन पोडे, कैलालीका अभिनव रावल र चितवनका सुमन बि.क. रहेका छन् । उनीहरूलाई थप अनुसन्धानका लागि प्रहरी वृत्त सातदोबाटोमा राखिएको प्रहरीले जनाएको छ ।

प्रहरीका अनुसार उनीहरूको साथबाट ६८९ क्याप्सुल ट्रामाडोल हाइड्रोक्लोराइड, १८४ ग्राम गाँजा जस्तो पदार्थ, ६ थान मोबाइल, २ थान डिजिटल तराजु र रु. ५ हजार ५ सय २५ नगद बरामद गरिएको छ ।
उक्त घटनाबारे थप अनुसन्धान भइरहेको प्रहरीले जनाएको छ ।

काठमाडौं, बैशाख ३१ गते – विश्व बैंकले नेपालको शिक्षा क्षेत्रमा थप लगानी तथा सहकार्य विस्तार गर्ने प्रतिबद्धता जनाएको छ । शिक्षा, विज्ञान तथा प्रविधिमन्त्री सस्मित पोखरेल सँग बिहीबार भएको भेटवार्तामा विश्व बैंकका नेपालका लागि देशीय निर्देशक डेभिड सिस्लेन ले यस्तो प्रतिबद्धता व्यक्त गरेका हुन् ।

शिक्षा मन्त्रालयमा भएको शिष्टाचार भेटका क्रममा शिक्षा क्षेत्र सुधार, शैक्षिक पूर्वाधार विस्तार तथा प्रविधिमैत्री शिक्षा प्रणाली निर्माणका विषयमा विस्तृत छलफल भएको मन्त्री पोखरेलको सचिवालयले जनाएको छ ।

भेटवार्ताका क्रममा विश्व बैंकले विशेषगरी विद्यालय तथा शैक्षिक पूर्वाधार विकासमा थप लगानी गर्न इच्छुक रहेको जनाएको छ । साथै दीर्घकालीन शिक्षा सुधार तथा गुणस्तरीय शिक्षामा पहुँच विस्तारका लागि नेपालसँगको साझेदारीलाई अझ प्रभावकारी बनाउने विषयमा सकारात्मक छलफल भएको बताइएको छ ।

मन्त्री पोखरेलले सरकारको वर्तमान प्राथमिकताबारे जानकारी दिँदै शैक्षिक पूर्वाधार विकास, फाउन्डेसन लर्निङ सुदृढीकरण तथा शिक्षामा डिजिटाइजेशन र प्रविधि विस्तारलाई सरकारको मुख्य एजेन्डाका रूपमा अघि बढाइएको बताएका थिए ।

“गुणस्तरीय, समावेशी र प्रविधिमैत्री शिक्षा प्रणाली निर्माण वर्तमान सरकारको मुख्य उद्देश्य हो,” मन्त्री पोखरेललाई उद्धृत गर्दै सचिवालयले जनाएको छ । उनले विकास साझेदार संस्थाहरूसँगको सहकार्यलाई अझ सुदृढ बनाइने पनि बताए ।

भेटमा डिजिटल शिक्षाको पहुँच विस्तार, सिकाइ उपलब्धि सुधार तथा समयानुकूल शिक्षा प्रणाली निर्माणका विषयमा समेत छलफल भएको मन्त्रालयले जनाएको छ ।

काठमाडौं, बैशाख ३१ गते — नेपाल प्रहरीको केन्द्रीय अनुसन्धान ब्युरो (सीआईबी) ले दूरसञ्चार सेवा प्रदायक एनसेल को लैनचौरस्थित मुख्यालयमा छापा मारेको छ।

स्मार्ट टेलिकमको सम्पत्ति लिलामीमार्फत खरिद गरेपछि पछिल्लो समय एनसेल विवादमा तानिएको अवस्थामा सीआईबीले बिहीबार उक्त कदम चालेको हो। स्रोतका अनुसार एनसेलभित्र भएको भनिएको अनियमिततासम्बन्धी अध्ययन गर्न गठित कार्यदलको प्रतिवेदन तथा नेपाल दूरसञ्चार प्राधिकरणले गरेको पत्राचारका आधारमा छापा मारिएको हो।

सीआईबी टोलीले मुख्यालयबाट विभिन्न महत्वपूर्ण कागजात तथा डिजिटल अभिलेख नियन्त्रणमा लिएको जनाएको छ। यद्यपि, अनुसन्धान प्रभावित हुने भन्दै अधिकारीहरूले विस्तृत विवरण सार्वजनिक गरेका छैनन्।
एनसेल यसअघि पनि शेयर बाँडफाँडसम्बन्धी विवादास्पद गतिविधि, कर छलि तथा स्वामित्व हस्तान्तरणसँग सम्बन्धित प्रकरणमा विवादमा पर्दै आएको छ।

भर्खरै मात्र नेपाल इन्भेष्टमेण्ट बैंकसँग मिलेर स्मार्टको सम्पत्ति गैरकानुनी रुपमा लिलामीमार्फत सकारेको प्रकरणमा एनसेलमाथि पनि अनुसन्धान हुन लागेको हो।