अन्तर्राष्ट्रिय

भारत, ९ बैशाख –  भारत का प्रधानमन्त्री नरेन्द्र मोदी ले “पहलगाम आतंकवादी आक्रमण” को पहिलो श्रद्धान्जली अर्पण गर्दै शोक सन्देश व्यक्त गरेका छन्।

भारतका प्रधानमन्त्री मोदीले उक्त आक्रमणमा ज्यान गुमाएका निर्दोष नागरिकहरूको सम्झना गर्दै उनीहरूलाई कहिल्यै नबिर्सिने बताएका छन्। साथै, उनले पीडित परिवारप्रति समवेदना व्यक्त गर्दै उनीहरू अहिले पनि ठूलो पीडामा रहेको उल्लेख गरेका छन्।

प्रधानमन्त्री मोदीले राष्ट्र यस्तो दुःखद घडीमा एकजुट भएको बताएका छन्। उनले भारत कुनै पनि प्रकारको आतंकवादसँग कहिल्यै नझुक्ने स्पष्ट पार्दै आतंकवादीहरूको योजना कहिल्यै सफल नहुने दृढ अडान व्यक्त गरेका छन्।

मुम्बई, २९ चैत – भारतकी चर्चित गायिका आशा भोसले को ९२ वर्षको उमेरमा आइतबार मुम्बईमा निधन भएको छ। उनलाई हृदयसम्बन्धी समस्या देखिएपछि ब्रीच क्यान्डी अस्पतालमा भर्ना गरिएको थियो, जहाँ उपचारकै क्रममा अन्तिम सास फेरेकी हुन्। उनकी नातिनी जनाई भोसलेले सुरुवातमा थकान र छाती दुखाइ मात्र भएको बताएकी थिइन्।

१२,००० भन्दा बढी गीत गाएकी आशाका ‘दम मारो दम’, ‘पिया तू अब तो आजा’ र ‘चुरा लिया है तुमने’ जस्ता गीतहरू आज पनि लोकप्रिय छन्।

आशा भोसले महान गायक दीनानाथ मंगेशकरकी छोरी तथा लाता मनगेश्कर की कान्छी बहिनी हुन्। सानै उमेरदेखि संघर्षपूर्ण जीवन बिताएकी उनले परिवार धान्न संगीत क्षेत्रमा प्रवेश गरेकी थिइन्।
उनको निधनसँगै भारतीय संगीत क्षेत्रमा एक युगको अन्त्य भएको मानिएको छ।

तेहरान, २९ चैत — अमेरिका र इरानबीच २१ घण्टा लामो शान्ति वार्ता कुनै ठोस सहमति बिना टुङ्गिएको छ। अमेरिकी उपराष्ट्रपति जेडी भान्सले इरानले अमेरिकाका ‘रेड लाइन’ स्वीकार नगरेपछि वार्ता निष्कर्षविहीन भएको बताएका छन्।

भान्सका अनुसार अमेरिकाले ‘अन्तिम प्रस्ताव’ अघि सारे पनि इरान सहमत हुन तयार भएन। इरानको आणविक कार्यक्रम पूर्ण रूपमा रोक्नु नै अमेरिकी पक्षको मुख्य अडान रहेको उनले दोहोर्‍याए।

वार्तामा जारेड कुश्नर र विशेष दूत स्टिभ विट्कफ पनि सहभागी थिए। अमेरिका पक्षले पाकिस्तानको मध्यस्थताको प्रशंसा गरेको छ।

यता, इरानले अमेरिकामाथि अत्यधिक र गैरकानुनी माग राखेको आरोप लगाउँदै आफ्नो वैध अधिकारमा अडिग रहेको जनाएको छ। दुवै पक्ष आफ्नो अडानबाट पछि नहट्दा मध्यपूर्वमा तनाव घटाउने प्रयास असफल भएको छ।

काठमाडौँ, २० चैत –  अहिले पाकिस्तानमा डिजेल र पेट्रोल सबैभन्दा महँगो भएको छ। पाकिस्तान सरकारले पेट्रोलको मूल्य ४ सय ३५ र हाई–स्पीड डिजेलको मूल्य ५ सय ५५ ले बढाएको छ।

जसअनुसार प्रति लिटर पेट्रोल ४ सय ५८ रुपैयाँ (पाकिस्तानी रुपैयाँ) र डिजेल प्रति लिटर ५ सय २० रुपैयाँ पुगेको छ।

हाल अमेरिका र इरानबीच जारी युद्धका कारण विश्वव्यापी कच्चा तेलको मूल्यमा भएको वृद्धिपछि यो निर्णय गरिएको जनाईएको हो। पेट्रोल डिजेलको नयाँ मूल्यहरू बिहीबार मध्यरातबाट लागू भएका छन्। यसअघि कायम भएको पेट्रोलको मूल्यभन्दा अहिले १३७.२३ रुपैयाँले बढेको हो भने डिजेल १८४.४९ रुपैयाँले बढेको हो।

यस्तै, मट्टितेलको मूल्य पनि ३४.०८ रुपैयाँले बढेर ४५७.८० रुपैयाँ प्रति लिटर पुगेको छ। गत महिना पेट्रोल र डिजेलको मूल्य ५५ रुपैयाँले बढेको थियो। त्यतिबेला पेट्रोलको मूल्य ३२१.१७ रुपैयाँ र डिजेलको मूल्य ३३५.८६ रुपैयाँ थियो।

नेपाली मुद्राभन्दा पाकिस्तानको मुद्रा दर कम हुन्छ |  पाकिस्तानको १०० रुपैँया बराबर नेपालको ५४.३२ रुपैँया हुन्छ।

मस्को, चैत १८ गते ।

रुसद्वारा कब्जा गरिएको क्रिमियामा मङ्गलबार साँझ एक रूसी सैन्य विमान दुर्घटनाग्रस्त हुँदा २९ जनाको ज्यान गएको छ। रूसी रक्षा मन्त्रालयका अनुसार एएन–२६ सैन्य यातायात विमानमा छ जना चालक दल र २३ जना यात्रु सवार थिए।

विमानले निर्धारित मार्गमा उडान भरेको बेला साँझ करिब ६ बजे सेनाले त्यससँग सम्पर्क गुमाएको थियो। प्रारम्भिक अनुसन्धानका अनुसार दुर्घटना प्राविधिक खराबीका कारण भएको अनुमान गरिएको छ। मन्त्रालयले विमानमा कुनै बाह्य आक्रमण वा हस्तक्षेप नभएको पनि बताएको छ।

दुर्घटनास्थल चट्टानी क्षेत्रमा रहेको हुनाले उद्धार प्रयास गर्दा पनि सबैको मृत्यु स्थलमै भएको पुष्टि भएको छ। राज्य सञ्चालित समाचार एजेन्सीहरू तास र आरआइए नोभोस्तीका स्रोतले घटना स्थलको अवस्था भयावह रहेको जनाएका छन्।

एएन–२६ सोभियतकालीन डिजाइनमा आधारित टर्बोप्रप सैन्य यातायात विमान हो, जुन विभिन्न सैन्य तथा लजिस्टिक कार्यका लागि प्रयोग हुँदै आएको छ।

काठमाडौँ, १० चैत — इरान र इजरायलबीच बढ्दो तनावका बीच शान्ति स्थापनाका लागि वार्ताको प्रयास तीव्र बनेको छ। यद्यपि, क्षेत्रीय अवस्था अझै पूर्ण रूपमा सामान्य भइसकेको छैन।

अमेरिकी राष्ट्रपति डोनाल्ड ट्रम्पको दाबीपछि इजरायलका प्रधानमन्त्री बेन्जामिन नेतन्याहूले स्पष्ट संकेत दिएका छन् कि जबसम्म इजरायलका सुरक्षा हितहरूको ठोस सुनिश्चितता हुँदैन, तबसम्म सैन्य दबाब कम गरिने छैन।

यसैबीच, समुद्री मार्गहरूको सुरक्षा र तेल आपूर्तिमा सम्भावित असरलाई लिएर अन्तर्राष्ट्रिय समुदाय सतर्क बनेको छ। विशेषगरी मध्यपूर्व क्षेत्रका जलमार्गहरूमा हुने कुनै पनि अवरोधले विश्वव्यापी ऊर्जा आपूर्तिमा प्रभाव पार्न सक्ने चिन्ता व्यक्त गरिएको छ।

कूटनीतिक स्रोतहरूका अनुसार, इस्लामाबाद वा अन्य कुनै तटस्थ स्थानमा प्रस्तावित वार्ताको तयारी भइरहेको छ। यदि उक्त वार्ता सफल भएमा, यसले वर्तमान समयमा सबैभन्दा महत्वपूर्ण शान्ति सम्झौताका रूपमा स्थान पाउन सक्ने अनुमान गरिएको छ।

काठमाडौँ, ९ चैत २०८२ –  अमेरिकाको न्यूयोर्कस्थित लागार्डिया विमानस्थलमा आइतबार राति भएको विमान दुर्घटनामा दुई जनाको मृत्यु भएको छ।

मोन्ट्रियलबाट ७६ जना सवार एयर क्यानडा एक्सप्रेसको ‘ज्याज ६४६’ उडान अवतरणका क्रममा धावनमार्गमा रहेको दमकल ट्रक १ सँग ठोक्किँदा यो दुर्घटना भएको हो।

राति करिब ११:४० बजे भएको घटनामा विमानको अगाडिको भाग पूर्ण रूपमा क्षतिग्रस्त भएको छ भने हवाई ट्राफिक नियन्त्रणमा अडियोमा नियन्त्रकले “रोक्नुहोस्, ट्रक १ रोक्नुहोस्” भन्दै चेतावनी दिएको केही सेकेन्डमै ठक्कर भएको सुनिन्छ।

विमानमा रहेका बाँकी यात्रुहरू सुरक्षित रूपमा बाहिर निस्किएका थिए , तर दमकलमा रहेका दुई पोर्ट अथोरिटीका अधिकारीहरू गम्भीर घाइते भएका छन् र केही यात्रु सामान्य घाइते भएका छन्।

संघीय उड्डयन प्रशासनले घटनालगत्तै लागार्डिया विमानस्थल पूर्ण रूपमा बन्द गराएको छ। विमानस्थल बन्द गर्दै सोमबार दिउँसोसम्मका सबै उडानहरू रद्द गरेको छ भने अन्य उडानहरू डाइभर्ट गरिएको छ। खराब मौसम र कम भिजिबिलिटीका बीच दुर्घटना भएको प्रारम्भिक अनुमान गरिएको छ र हाल घटनाको विस्तृत अनुसन्धान भइरहेको छ।