कोशी प्रदेश

सुनसरी, माघ २१ गते —
सुनसरी जिल्लामा लागू औषध कारोबारमा संलग्न रहेको आरोपमा ब्राउन सुगरसहित तीन जनालाई प्रहरीले पक्राउ गरेको छ।

इलाका प्रहरी कार्यालय लौकही र लागू औषध नियन्त्रण ब्युरो विराटनगरको संयुक्त टोलीले माघ २० गते सुनसरीको कोशी गाउँपालिका–१ र भोक्राहा नरसिंह गाउँपालिका–६ क्षेत्रबाट उनीहरूलाई नियन्त्रणमा लिएको हो।

पक्राउ पर्नेमा धनकुटा नगरपालिका–९ का सुक्दिप राई र सहिदभूमि गाउँपालिका–४ का साजन राई रहेका छन्। उनीहरूको साथबाट १० ग्राम ५२ मिलिग्राम ब्राउन सुगर बरामद गरिएको प्रहरीले जनाएको छ। त्यस्तै सप्तरी जिल्लाका इश्वर प्रसाद भगतलाई ३ ग्राम ०४ मिलिग्राम ब्राउन सुगरसहित पक्राउ गरिएको छ।

पक्राउ परेका तीनै जनामाथि लागू औषध सम्बन्धी कसुरमा थप अनुसन्धान भइरहेको जिल्ला प्रहरीले जानकारी दिएको छ।

भोजपुर, माघ १६।
भोजपुर जिल्लाको हतुवागढी गाउँपालिका–९ मचुवा क्षेत्रबाट ठूलो परिमाणको लागूऔषध गाँजासहित ट्र्याक्टर र ९ जनालाई प्रहरीले पक्राउ गरेको छ।

प्रहरीका अनुसार माघ १५ गते बिहान प्रहरी चौकी हसनपुर, भोजपुरबाट खटिएको प्रहरी टोलीले मचुवाबाट धनकुटाको अखुवाटारतर्फ जाँदै गरेको ना ७ त ३५० नम्बरको ट्र्याक्टरलाई शंका लागी चेकजाँच गरेको थियो। जाँचका क्रममा ट्र्याक्टरको डिक्कीभित्र ४३ वटा बोरामा राखिएको जम्मा ८२६ किलो ६६० ग्राम लागूऔषध गाँजा बरामद गरिएको प्रहरीले जनाएको छ।

उक्त घटनामा संलग्न रहेको आरोपमा भोजपुरको आमचोक गाउँपालिका–९ का रुद्रबहादुर श्रेष्ठ, निशान मगर र नीरबहादुर श्रेष्ठ, धनकुटाको सहिदभूमि गाउँपालिका–२ का सुदिप पुर्कुटी, निलकुमार मगर, किशोर बिसुन्के, बिर्खबहादुर बिसुन्के र दिपकुमार बिसुन्के तथा ताप्लेजुङको मिरिङ्डेन गाउँपालिका–६ का लाक्पा शेर्पालाई पक्राउ गरिएको छ।

पक्राउ परेकाहरूसँगै गाँजा बोकेको ट्र्याक्टर पनि नियन्त्रणमा लिइएको प्रहरीले जनाएको छ। घटनासम्बन्धी थप अनुसन्धान भइरहेको जिल्ला प्रहरी कार्यालय भोजपुरले जानकारी दिएको छ।

सुनसरी, १७ पुस — सुनसरीको कोशी गाउँपालिका–१ मा सशस्त्र प्रहरीको गोली लागेर स्थानीय ४५ वर्षीय विजय साहको मृत्यु भएपछि उत्पन्न तनाव अन्त्य गर्न पाँच बुँदे सहमति भएको छ।
बुधबार राति करिब १ बजे भारतबाट सिटी सफारीमार्फत सामान लिएर नेपाल फर्कँदै गरेका साहमाथि सशस्त्र प्रहरीले गोली चलाउँदा उनको घटनास्थलमै मृत्यु भएको थियो। घटनापछि स्थानीयवासी र पीडित पक्ष आन्दोलित बनेका थिए। आन्दोलनका क्रममा स्थानीय र प्रहरीबीच दिउसो ३ बजेसम्म झडपसमेत भएको थियो भने सशस्त्र प्रहरीको सीमा सुरक्षा पोष्टमा आक्रमण भएको बताइएको छ।
बिहीबार जिल्ला प्रशासन कार्यालय सुनसरीमा जिल्ला प्रशासन, सुरक्षा निकायका प्रतिनिधि र पीडित पक्षबीच भएको वार्तामा घटनाको निष्पक्ष छानबिन गर्ने, मृतकका परिवारलाई उचित क्षतिपूर्ति प्रदान गर्ने तथा परिवारका सदस्यलाई रोजगारीको व्यवस्था गर्ने लगायतका विषयमा पाँच बुँदे सहमति जुटेको हो।
सहमति कार्यान्वयनसँगै क्षेत्रको अवस्था सामान्य बनाउने प्रयास भइरहेको जिल्ला प्रहरी कार्यालय सुनसरीका प्रवक्ता डीएसपी चन्द्र खड्काले जानकारी दिए। उनका अनुसार सुरक्षा व्यवस्था सुदृढ बनाइएको छ भने शान्ति कायम राख्न स्थानीयसँग समन्वय भइरहेको छ।
घटनाको विस्तृत छानबिनका लागि सम्बन्धित निकायबाट समिति गठन गरिने र दोषी देखिए कानुनी कारबाही अघि बढाइने प्रशासनले जनाएको छ।