उत्सव खबर

दैलेख, ३० चैत । दैलेखको गुराँस गाउँपालिकाका तत्कालीन प्रमुख प्रशासकीय अधिकृत दीपककुमार आचार्य र आर.के. कन्स्ट्रक्सन कम्पनी सुर्खेतका सञ्चालक सुवास कार्कीविरुद्ध अख्तियार दुरुपयोग अनुसन्धान आयोगले सोमबार विशेष अदालत काठमाडौंमा भ्रष्टाचार मुद्दा दायर गरेको छ।

आयोगका अनुसार आचार्यमाथि २२ लाख ४४ हजार ५ सय रुपैयाँ बिगो माग गरिएको छ। आर.के. कन्स्ट्रक्सनका सञ्चालक कार्कीविरुद्ध पनि सोही रकम बराबरको बिगो कायम गरिएको छ।

आयोगका प्रवक्ता सुरेश न्यौपानेले जारी गरेको विज्ञप्तिमा आचार्यलाई भ्रष्टाचार निवारण ऐन, २०५९ को दफा १७ बमोजिमको कसुरमा मुद्दा चलाइएको उल्लेख छ। उनलाई ऐनको दफा ३ को उपदफा (१) को (घ) अनुसार कैद र जरिवानासहित बिगो असुलउपरको माग गरिएको छ।

त्यस्तै, कन्स्ट्रक्सन कम्पनीका सञ्चालक कार्कीलाई गैरकानुनी लाभ लिन सहयोग गरेको आरोपमा ऐनको दफा २२ बमोजिम मतियारको रूपमा मुद्दा दायर गरिएको छ। सोही दफाको प्रावधानअनुसार मुख्य कसुरदारसरह सजायको माग गरिएको आयोगले जनाएको छ।

काठमाडौं, २९ चैत — प्रधानमन्त्री बालेन्द्र शाह (बालेन) ले आफ्नो सम्पत्ति विवरण सार्वजनिक गरेका छन्। आइतबार प्रधानमन्त्री तथा मन्त्रिपरिषद्को कार्यालयले सार्वजनिक गरेको विवरणअनुसार उनको बैंक खातामा रु. १ करोड ४६ लाख रकम रहेको उल्लेख गरिएको छ।

सार्वजनिक विवरणमा बालेनको आम्दानीको मुख्य स्रोत सामाजिक सञ्जाल रहेको जनाइएको छ। उनले फेसबुक, युट्युब, टिकटक, स्पोर्टिफाई र आइट्युन्समार्फत आम्दानी गर्ने गरेका छन्।

त्यसैगरी, उनकी श्रीमती सबिना काफ्लेको नाममा १९० तोला सुनका गहना रहेको खुलाइएको छ। उक्त गहनाको स्रोत ‘पैतृक’ उल्लेख गरिएको छ।

काठमाडौं, २९ चैत — भारतीय प्रधानमन्त्री नरेन्द्र मोदीले प्रधानमन्त्री बालेन्द्र शाहलाई भारत भ्रमणको निम्तो दिएका छन्। परराष्ट्रमन्त्री शिशिर खनालका अनुसार शाहले निम्तो स्वीकार गरिसकेका छन्।

मोरिससमा आयोजित नवौं हिन्द महासागर सम्मेलनमा सहभागी रहेका मन्त्री खनालले भ्रमणलाई परिणाममुखी बनाउन दुवै देशबीच तयारी भइरहेको बताए। प्राविधिक र राजनीतिक तहमा गृहकार्य पूरा भएपछि मात्र भ्रमणको मिति तय गरिनेछ।

खनाल र भारतीय विदेशमन्त्री एस जयशंकरबीच भएको भेटमा प्राथमिकतामा आधारित परियोजना अघि बढाएर द्विपक्षीय संयन्त्र सक्रिय बनाउने सहमति भएको छ। साथै, नयाँ सहकार्यका क्षेत्र पहिचान गर्ने र जारी परियोजनाको समीक्षा गर्ने विषयमा पनि समझदारी बनेको छ।

नेपालले आन्तरिक तयारी पूरा गरेपछि भारतसँग थप वार्ता अघि बढाइने र त्यसपछि भारतीय परराष्ट्र सचिवको नेपाल भ्रमण हुने अपेक्षा गरिएको छ। सरकारले द्विपक्षीय सम्बन्धलाई औपचारिकतामा सीमित नराखी ठोस उपलब्धि हासिल गर्ने लक्ष्य राखेको जनाएको छ।

काठमाडौं, २८ चैत — पुष्प कमल दाहाल प्रचण्ड ले आफू कुनैपनि प्रकारको भ्रस्टाचार काण्ड छानबिनका लागि तयार रहेको बताएका छन्।

प्रचण्डले शनिबार पार्टी केन्द्रीय कार्यालयमा सञ्चारकर्मीहरूसँग कुरा गर्दै उनले विगतका निर्णयहरूको जिम्मेवारी लिन आफू तयार रहेको स्पष्ट पारे। आफू प्रधानमन्त्री हुदा आफ्नो कार्यकालमा भएका सबै निर्णयहरू पारदर्शी रहेको दाबी गर्दै उनले त्यसको सामना गर्न आफूलाई कुनै डर नभएको पनि जिकिर गरे।

“मेरै पालामा निर्णय गरेको हो भनेर मैले धेरै चोटी भनिसकेको छु। तपाईंहरूले बुझ्नु हुन्न कि के हो सम्पूर्ण छानबिनका लागि म तयार छु,” उनले भने।
वर्तमान सरकारको कार्यशैलीबारे सञ्चारकर्मीले सोधेको प्रश्नमा भने उनले अहिले नै टिप्पणी गर्ने समय नभएको प्रतिक्रिया दिए।