उत्सव खबर

काठमाडौँ, ६ मङ्सिर –  नेपाली कांग्रेसले आगामी प्रतिनिधिसभा निर्वाचनमा सहभागी हुने औपचारिक निर्णय गरेको छ। शनिबार बसेको केन्द्रीय कार्यसमिति बैठकले निर्वाचनमा भाग लिने निर्णय गर्दै हालको राजनीतिक अवस्थाको समाधान निर्वाचनमै रहेको ठहर गरेको हो।

मुख्यसचिव कृष्णप्रसाद पौडेलद्वारा जारी विज्ञप्तिमा २०८२ फागुन २१ गते तोकिएको निर्वाचनमार्फत संविधानको रक्षा, जनआन्दोलनका मागहरूको संस्थागत रूपान्तरण तथा देशलाई स्थिरतर्फ अघि बढाउन सकिने विश्वास व्यक्त गरिएको छ।

कांग्रेसले निष्पक्ष र भयरहित वातावरण बिना निर्वाचन सफल नहुने भन्दै हाल देखिएका सुरक्षा चुनौतीप्रति गम्भीर चिन्ता व्यक्त गरेको छ। फरार कैदीबन्दीको ठूलो संख्या, हराइरहेका हातहतियार, राजनीतिक दलहरूलाई कार्यक्रम सञ्चालनमा देखिएको अवरोध तथा आवश्यक न्यूनतम सुरक्षा वातावरण पनि बनाउन नसकिएको अवस्थालाई पार्टीले अत्यन्त संवेदनशील विषयका रूपमा प्रस्तुत गरेको छ। कांग्रेसले सरकारलाई तत्काल शान्ति–सुरक्षा सुधार, सुरक्षाकर्मीको मनोबल वृद्धि तथा नागरिकमा भयमुक्त वातावरण सुनिश्चित गर्न जोरदार माग समेत गरेको छ।

काठमाडौँ, ६ मङ्सिर –  नेकपा एमालेले प्रतिगामी कदम तथा असंवैधानिक गतिविधिको विरोध गर्दै जनपरिचालन कार्यक्रमअन्तर्गत आज काठमाडौंमा ‘शक्ति प्रदर्शन’ गर्दैछ। बागमती प्रदेश कमिटीले आयोजना गरेको ‘शान्तिपूर्ण जनप्रदर्शन तथा जनसभा’ प्रदर्शनीमार्गबाट सुरु भएर भृकुटीमण्डपमा आमसभामा परिणत हुनेछ।

एमालेले प्रतिनिधिसभाको पुनर्स्थापनालाई मुख्य माग राख्दै आजको जनसभालाई शक्ति प्रदर्शनको रूपमा अघि सारेको हो। पार्टीका प्रचार तथा प्रकाशन विभाग प्रमुख राजेन्द्र गौतमका अनुसार भदौ २३ र २४ गतेका घटनापछि ‘असंवैधानिक रूपमा प्रधानमन्त्री नियुक्ति र प्रतिनिधिसभा विघटन’ भएको विरोधमा एमालेले देशव्यापी जनपरिचालन चलाउँदै आएको छ।

गौतमका अनुसार वडा, पालिका र जिल्ला तहमा जनपरिचालनका कार्यक्रमहरू पूरा भइसकेका छन्। कात्तिक २२ गते देशभरका वडामा भेला, २५ गते पालिकास्तरीय र कात्तिक २९ गते जिल्लास्तरीय जनसभा सम्पन्न गरिसकेको जानकारी उनले दिए। उनका अनुसार, आजको प्रदर्शनसँगै जनपरिचालनको पहिलो चरण समापन हुनेछ।

एमालेका नेता, कार्यकर्ता, जनसंगठन र सम्पर्क समन्वय समितिबाट निकालिने र्‍याली प्रदर्शनीमार्गमा एकत्रित हुनेछ। त्यहाँबाट रथमार्ग हुँदै रत्नपार्क परिक्रमा गरी भृकुटीमण्डपमा पुग्ने र आमसभा सञ्चालन हुने गौतमले बताए। जनसभालाई अध्यक्ष केपी शर्मा ओलीसहित शीर्ष नेताहरूले सम्बोधन गर्नेछन्।

गौतमका अनुसार, पहिलो चरणको अभियान समाप्त भएपछि मंसिर २७ गते काठमाडौंमै ११औँ महाधिवेशन उद्घाटनका अवसरमा अर्को विशाल जनसभा आयोजना गरिनेछ।

काठमाडौँ, ५ कार्तिक –  नेकपा एमालेका अध्यक्ष केपी शर्मा ओलीले पार्टीले हालै सार्वजनिक गरेको ‘युथ भोलेन्टियर फोर्स’ देशभर शान्ति र सुव्यवस्था कायम गर्न गठन गरिएको दाबी गरेका छन्। शुक्रबार काठमाडौंमा आयोजित कमाण्ड घोषणा कार्यक्रमलाई सम्बोधन गर्दै उनले यो फोर्स कुनै राजनीतिक प्रतिद्वन्द्वी वा व्यक्तिविशेषविरुद्ध उभिने संगठन नभएको स्पष्ट पारे। अध्यक्ष ओलीका अनुसार फोर्सका सदस्यहरू पूर्ण रूपमा अनुशासित भएर राष्ट्रिय हितका लागि कार्य गर्नेछन्।

उनले भने, “यो स्वयंसेवक फोर्स कसैको अहितका लागि होइन, बरु सबैको जिउधनको सुरक्षाका लागि गठन गरिएको हो। असहमति राख्नेहरूका लागि पनि यसको उद्देश्य सुरक्षा र सहयोग नै हो।” ओलीले राज्य संयन्त्र मात्रले देशमा आवश्यक शान्ति–सुरक्षा सुनिश्चित गर्न नसक्ने अवस्था बनेकाले स्वयंसेवक फोर्स आवश्यक रहेको बताए। उद्योग–व्यवसाय तथा औद्योगिक प्रतिष्ठानहरू समेत सुरक्षित राख्न कठिन भइरहेको उल्लेख गर्दै उनले ‘युथ भोलेन्टियर फोर्स’ले यस्तो चुनौतीपूर्ण अवस्थालाई सम्बोधन गर्न भूमिका खेल्ने विश्वास प्रकट गरे।

ओलीले थप्दै भने यो फोर्स देशमा शान्ति, सुव्यवस्था कायम राख्न बनेको हो। यसको गठनसँग कोही पनि डराउनुपर्ने अवस्था छैन।” एमालेले सार्वजनिक गरेको यो संगठनले आगामी दिनमा पार्टीका विभिन्न कार्यक्रम तथा जनसहभागिता आवश्यक पर्ने गतिविधिमा स्वंयसेवी भूमिका निर्वाह गर्ने जनाएको छ।

सप्तरी, ५ कार्तिक :  सप्तरीमा ठूलो परिमाणको अवैध लागूऔषधसहित एक ट्रक चालक पक्राउ परेको छ। जिल्लाको कञ्चनरूप नगरपालिका–२, बरमझियाबाट प्रहरीले करिब ९ सय ७८ किलो गाँजा बरामद गरेको हो।

पक्राउ पर्नेमा सुनसरी, धरान उपमहानगरपालिका–१३ का २५ वर्षीय संजय श्रेष्ठ रहेका छन्। जिल्ला प्रहरी कार्यालय सप्तरीसहितको संयुक्त टोलीले बिहीबार राति फत्तेपुरबाट भारदहतर्फ जाँदै गरेको ना. ५ ख ५३५ नम्बरको ट्रकलाई जाँच गर्ने क्रममा गाँजा फेला पारेको हो।

प्रहरीका अनुसार ट्रकमा फल्स बटम बनाई २८ वटा बोरामा उक्त मात्रा लुकाइ–छिपाइ राखिएको थियो। विशेष सूचनाका आधारमा गरिएको निगरानीपछि ट्रक रोकिने वित्तिकै तलासी लिँदा ठूलो परिमाणमा गाँजा भेटिएको प्रहरीले जनाएको छ। घटना सम्बन्धमा चालक संजय श्रेष्ठलाई नियन्त्रणमा लिइएको र थप संलग्नता तथा स्रोत–गन्तव्यबारे आवश्यक अनुसन्धान भइरहेको प्रहरीले जानकारी दिएको छ।

काठमाडौँ, ४ कार्तिक — जेन–जी विद्रोहको जगमा बनेर गठन गरिएको सुशीला कार्की नेतृत्वको सरकारले जनम्यान्डेट पूरा गर्न नसकेको आरोप लगाउँदै जेन–जीसँग सम्बद्ध २३ वटा समूह तथा एलाइन्सले आफ्नै नेतृत्वमा नयाँ सरकार गठन गर्न राष्ट्रपति समक्ष माग गरेका छन्।

बिहीबार शीतलनिवास पुगेका उनीहरूले राष्ट्रपति रामचन्द्र पौडेललाई संयुक्त रूपमा ज्ञापनपत्र बुझाउँदै वर्तमान सरकार ‘दिशाहीन’ तथा ‘विद्रोही एजेन्डाबाट विचलित’ भएको दाबी गरे। उनीहरूले प्रधानमन्त्री सुशीला कार्कीलाई तत्काल फिर्ता बोलाउन र जेन–जी नेतृत्वमा नयाँ सरकारको प्रक्रियामा राष्ट्रपति सक्रिय हुनुपर्ने सुझाव दिएका छन्। जेन–जी समूहहरूले बुझाएको ज्ञापनपत्रमा वर्तमान सरकार देशलाई केवल चाँडो चुनावतिर लैजान केन्द्रित भएको र विद्रोही पक्षले अघि सारेका महत्त्वपूर्ण एजेन्डा बेवास्ता गरिएको उल्लेख छ। ज्ञापनपत्रमा, ठूला भ्रष्टाचार प्रकरणमा संलग्नमाथि कारबाही नहुनु,  प्रत्यक्ष निर्वाचित कार्यकारी प्रधानमन्त्रीको व्यवस्था गर्न संविधान संशोधन नहुनु, विद्रोहकालीन दमन तथा नरसंहारका घटनामा संलग्नमाथि कारबाही रोकिनु, तथा सुशासन र पारदर्शितामा सरकार कमजोर हुनु मुख्य कारण रहेको छ | जेन जी हरु भने, “विद्रोह र सहादत केवल चुनावका लागि थिएन” र वर्तमान सरकारले विद्रोही जनम्यान्डेट गुमाइसकेको छ।

‘जेन–जी नेसनल फ्रन्ट लाइनर’, ‘जेन–जी पार्लियामेन्ट’, ‘स्वतन्त्र जेन–जी नेपाल’ लगायतका संस्थाहरूले पुरानै दल वा नेतृत्वले देशको समस्याको समाधान गर्न नसक्ने निष्कर्ष निकाल्दै अब जेन–जी आन्दोलनका नेतृत्वकर्ताहरूलाई जिम्मेवारी दिनुपर्ने बताएका छन्। ज्ञापनपत्रमा भनिएको छ, “यो सरकारले विद्रोहीको माग सम्बोधन गर्न नसक्ने देखिएकोले यसलाई फिर्ता बोलाई हाम्रो नेतृत्वमा नयाँ सरकार गठनका लागि राष्ट्रपतिज्यू मध्यस्थ बन्नु पर्ने अनुरोध गर्दछौँ।”उल्लेख छ |

जेन–जी समूहहरूले सरकार परिवर्तनको मागसहित राष्ट्रपति समक्ष दबाब बढाएपछि राजनीतिक वृत्तमा नयाँ तरंग उत्पन्न भएको छ। तर, राष्ट्रपति कार्यालयले उक्त ज्ञापनपत्रबारे औपचारिक प्रतिक्रिया अझै सार्वजनिक गरेको छैन।

काठमाडौँ, ३ कार्तिक –  एमाले अध्यक्ष केपी शर्मा ओलीले सरकारको नेतृत्वप्रति तीव्र असन्तोष व्यक्त गरेका छन्। विघटित प्रतिनिधिसभाको एमाले संसदीय दलको बैठकमा बोल्दै उनले सरकारले संविधान र लोकतान्त्रिक मूल्यप्रतिको आफ्नो दायित्व गम्भीर रूपमा कमजोर पारेको आरोप लगाए।

ओलीले विशेष रूपमा सुदन गुरुङलाई लक्षित गर्दै संविधानको वैधता नै प्रश्न उठाउने व्यक्तिलाई सरकारी संरचनामा महत्व दिइनु “लोकतान्त्रिक मान्यतासँग पूर्ण असंगत” भएको टिप्पणी गरे। संविधान फाल्ने कि राख्ने भन्ने अभिव्यक्ति सार्वजनिक रूपमा आए पनि राज्यका आधिकारिक निकायले कुनै प्रतिक्रिया नदिएको अवस्थाले सरकारकै मनोवृत्ति प्रस्ट भएको उनले बताए।“संविधान निर्माणमा लगाइएको ठूलो राजनीतिक श्रम, सहमति र त्यागको सम्मान गर्ने जिम्मेवारी सरकारले बोक्नुपर्छ,” ओलीले भने, “तर सरकारको मौनता र दुविधाले राज्य प्रणाली नै कमजोर बन्दै गएको छ।”

उनका अनुसार यस्तो प्रवृत्तिले शासन प्रणाली अलोकतान्त्रिक दिशातर्फ धकेलिएको छ र यस्तो मनोवृत्तिको सरकारलाई वैध मान्न नै नसकिने स्थिति बन्दै गएको छ। ओलीले संविधान र लोकतान्त्रिक मूल्यप्रतिको दायित्वबाट नभाग्न सरकारलाई चेतावनीसमेत दिए।

मधेस प्रदेश, ३ कार्तिक –  मधेस प्रदेशसभाका सभामुख रामचन्द्र मण्डल “पदअनुकूल आचरण नगरेको” आरोपमा बुधबार विशेष बैठकमार्फत दुई तिहाइभन्दा बढी मतले पदमुक्त भएका छन्। उपसभामुख बबिता कुमारी राउत ईशरको सभापतित्वमा बसेको बैठकमा प्रस्तावको पक्षमा ७६ मत परे, विपक्षमा शून्य मत आएको थियो।

गत २७ कात्तिकमा सात दलीय गठबन्धनका ६४ सांसदले मण्डलविरुद्ध अविश्वास प्रस्ताव दर्ता गरेका थिए। आरोपहरूमा सदन मनोमानी संचालन, सांसदलाई बोल्न नदिने र आक्रमणसमेत गरेको उल्लेख गरिएको थियो।

मतदान सुरु हुनुअघि नै एमाले सांसदहरू बैठकबाट बाहिरिएपछि प्रस्ताव सहजै पारित भयो। सभामुख पद रिक्त भएसँगै अब प्रदेशसभाले नयाँ सभामुख चयन प्रक्रिया अघि बढाउनेछ।