उत्सव खबर

काठमाडौँ, १६ मङ्सिर –  अख्तियार दुरुपयोग अनुसन्धान आयोगले कटहरिया नगरपालिकाका तत्कालीन निमित्त प्रमुख प्रशासकीय अधिकृत रामप्रकाश साह सहित ७ जनाविरुद्ध विशेष अदालत काठमाडौंमा भ्रष्टाचारसम्बन्धी मुद्दा दायर गरेको छ।

आयोगका अनुसार सार्वजनिक सम्पत्तिमा हानी–नोक्सानी पुर्‍याउँदै मिलेमतोमा रकम हिनामिना गरेको आरोपमा साहसहित सहायक लेखापाल विवेक कुमार सहनी, सहायक स्तर पाँचौं राम नरेश प्रसाद यादव, कम्प्युटर अपरेटर उमेश कुमार दास, खरिदार कौशल किशोर चौधरी र छोटेलाल मिश्रलाई प्रतिवादी बनाइएको छ।

यसबाहेक सरिता फाउण्डेसन काठमाडौं तथा फाउण्डेसनकी निर्देशक सरिता कुमारी साहविरुद्ध पनि सोही मुद्दामा विपक्षीका रूपमा मुद्दा दायर गरिएको आयोगले जनाएको छ। उनीहरूविरुद्ध जनही ९ लाख ९८ हजार ९२१ रुपैयाँ विगो दाबी गरिएको छ।

आर्थिक वर्ष २०७७/७८ मा नगरसभा स्वीकृति बिना पाँच लाख रुपैयाँको चेक सरिता फाउण्डेसनका नाममा काटी रकम हिनामिना भएको उजुरी आयोगमा दर्ता भएपछि अनुसन्धान सुरु गरिएको थियो।

अनुसन्धानका क्रममा प्रतिवादीहरूले मिलेमतोमा बदनियतपूर्वक कुल ९ लाख ९८ हजार ९२१ रुपैयाँ सरकारी कोषबाट भुक्तानी लिइ–दिई हिनामिना गरेको प्रमाण ठहरिएपछि सोही बराबरको विगो तथा कानुनी सजाय मागसहित आरोपपत्र दायर गरिएको आयोगले जनाएको छ।

काठमाडौँ, १६ मङ्सिर –  आगामी प्रतिनिधिसभा निर्वाचनलाई लक्षित गर्दै सुरक्षार्थ भर्ना गरिने अस्थायी जनशक्तिलाई अब ‘म्यादी प्रहरी’ होइन, ‘निर्वाचन प्रहरी’ नाम दिइने भएको छ। नेपाल प्रहरी मातहत रहने गरी सञ्चालन हुने यो व्यवस्थालाई नयाँ पहिचान दिन गृह मन्त्रालयले निर्णय गरेको हो।

गृह मन्त्रालयका प्रवक्ता आनन्द काफ्लेका अनुसार नाम परिवर्तनसँगै निर्वाचन सुरक्षा व्यवस्थालाई अझ व्यवस्थित, जिम्मेवारीपूर्ण र उद्देश्यअनुरूप बनाउन मद्दत पुग्ने विश्वास लिइएको छ। “म्यादी प्रहरीको साटो निर्वाचन प्रहरी नामकरण गरेर ४० दिनको कार्यअवधिसहित भर्ना प्रक्रिया अघि बढाइएको छ,” काफ्लेले बताए। उनका अनुसार नाम परिवर्तन मात्र प्रमुख कुरो नभए पनि निर्वाचनका लागि खटिने जनशक्तिको भूमिकासँग अनुरूप पहिचान प्रदान गर्न यसले सकारात्मक प्रभाव पार्नेछ।

निर्वाचन प्रहरी व्यवस्थापनका लागि ‘निर्वाचन प्रहरी भर्ना, छनोट, नियुक्ति तथा परिचालनसम्बन्धी मापदण्ड–२०८२’ को मस्यौदा नेपाल प्रहरी प्रधान कार्यालयमार्फत तयारी भइरहेको छ। मापदण्ड अन्तर्गत निर्वाचन प्रहरीलाई छनोटदेखि मत परिणाम सार्वजनिक नहुन्जेलसम्म कार्यअवधि निर्धारण गरी परिचालन गरिनेछ। निर्वाचन प्रहरीलाई प्रहरी जवानले पाउने आधारभूत तलबमान अनुसार पारिश्रमिक प्रदान गरिनेछ। साथै सरहको रासन भत्ता, पोसाक भत्ता, यात्रा भत्ता तथा विगतमा प्रदान गर्दै आएको खाजा खर्च पनि उपलब्ध गराइनेछ।

२०७९ सालको प्रतिनिधिसभा निर्वाचनमा म्यादी प्रहरीलाई ४० दिनका लागि प्रतिदिन ८६९ रुपैयाँका दरले ३४ हजार ७६० रुपैयाँ पारिश्रमिक दिइएको थियो। साथै ७ हजार २ सय रासन भत्ता, हिमाली जिल्लामा स्थानीय दरअनुसार अतिरिक्त रासन, पोसाकका लागि ६ हजार, ज्याकेट किन्न १ हजार, यातायात खर्चका लागि १ हजार तथा तीन दिनका लागि दैनिक ३०० का दरले खाजा उपलब्ध गराइएको थियो। यसपटक भने नयाँ नामकरण र अद्यावधिक मापदण्डसहित निर्वाचन सुरक्षामा अझ प्रभावकारी व्यवस्थापन हुने मन्त्रालयको अपेक्षा छ।

काठमाडौं, १४ मङ्सिर — प्रभु बैंक लिमिटेडका प्रमुख कार्यकारी अधिकृत (सिइओ) अशोक शेरचनलाई बैंकिङ कसुरसम्बन्धी आरोपमा प्रहरीले पक्राउ गरेको छ। प्रहरीको केन्द्रीय अनुसन्धान ब्यूरो (सिआइबी)ले शनिबार शेरचनलाई नियन्त्रणमा लिएको प्रवक्ता प्रहरी वरिष्ठ उपरीक्षक (एसएसपी) शिव श्रेष्ठले जानकारी दिए।

सिआइबीका अनुसार प्रभु म्यानेजमेन्टकी अध्यक्ष कुसुम लामाले दर्ता गराएको रु ९८ करोडको ठगीसम्बन्धी उजुरीका आधारमा अनुसन्धान अगाडि बढाइएको हो। सोही प्रकरणमा शेरचनमाथि बैंकिङ कसुरमा संलग्नता रहेको आशंकामा पक्राउ गरी अनुसन्धान भइरहेको प्रहरीले जनाएको छ।

उक्त मुद्दा वित्तीय अनुशासन र बैंकिङ प्रक्रियासँग सम्बन्धित भएकाले सिआइबीले विस्तृत छानबिन गरिरहेको बताएको छ। शेरचनलाई आवश्यक अनुसन्धानका लागि पक्राउ गरिएको र कानुनी प्रक्रिया अनुसार कारवाही अगाडि बढाइने प्रहरीले जनाएको छ।