वीरगन्ज, २२ मङ्सिर — वीरगन्ज–१३ राधेमाईबाट भारतीय प्रहरीले नेपाल प्रहरीलाई कुनै जानकारी नदिई एक नेपाली नागरिकलाई नियन्त्रणमा लिएर भारत लागेको छ। आइतबार राति भारतीय नम्बरप्लेटको गाडीमा आएका सादा पोशाकधारी भारतीय सुरक्षा कर्मीहरूले पर्सा जिल्ला सखुवा प्रसौनी गाउँपालिका–५, खजुरियाका मेघराज साहलाई नियन्त्रणमा लिएर सीमा पार गराएको परिवारजनले दाबी गरेका छन्।
साह केही समयदेखि वीरगन्ज–१३ राधेमाईमा बस्दै आएका थिए। परिवारका अनुसार तीन जना भारतीय प्रहरी पहिले साहको गाउँ खजुरियामै पुगेका थिए। त्यहाँ उनको खोजी गर्दा नपाएपछि उनीहरू राति नै वीरगन्ज–१३ राधेमाई पुगेका र त्यहींबाट साहलाई समातेर भारततर्फ लगेका थिए।
स्रोतका अनुसार केही दिनअघि भारतमा ५० किलोभन्दा बढी चरेससहित एक व्यक्ति पक्राउ परेका थिए। सो व्यक्तिले दिएको बयानका आधारमा मेघराज साहको नाम जोडिएको हुनसक्ने र त्यसकै आधारमा भारतीय प्रहरी रातारात नेपाल भित्रिई साहलाई लगेको बताइएको छ।
यता जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक हरिबहादुर बस्नेतले भने यसबारे कुनै जानकारी प्राप्त नभएको बताएका छन्। उनले भने, “भारतीय प्रहरीले मान्छे पक्रेर लगेको भए हामीलाई खबर हुन्थ्यो। सायद यो खबर झुट्टो पनि हुनसक्छ।”तर यस बारे सत्य तथ्य पता बुझ्ने प्रयास गरिरहेका छौ|
