Breaking News

वीरगंज पर्सा, ३ बैशाख २०८३, राजु साह 
जिल्ला प्रहरी कार्यालय पर्सा ले चालु आर्थिक वर्षअन्तर्गत चैत्र महिनामा अपराध नियन्त्रण, राजश्व चुहावट रोकथाम तथा फैसला कार्यान्वयनका क्षेत्रमा उल्लेखनीय सफलता हासिल गरेको जनाएको छ। प्रहरी कार्यालयले सार्वजनिक गरेको प्रगति विवरणअनुसार विभिन्न कारवाहीमार्फत प्रभावकारी नतिजा हासिल गरिएको हो।

जिल्ला प्रहरी कार्यालयका प्रमुख प्रहरी उपरीक्षक सुदिपराज पाठक का अनुसार चैत्र महिनामा जिल्लाभर १५२ वटा अपराधका मुद्दा दर्ता भएका छन्। तीमध्ये संगठित तथा आर्थिक अपराधका मुद्दा सबैभन्दा बढी, ५८ वटा रहेका छन्। विभिन्न घटनामा संलग्न १०२ जना प्रतिवादी पक्राउ गरिएको छ।

अदालतको फैसला कार्यान्वयनअन्तर्गत प्रहरीले ६८ जना फरार प्रतिवादीलाई पक्राउ गरी १३ वर्ष ३ महिना २५ दिन कैद भुक्तान गराएको छ भने रु. १,२३,२०,७४८ जरिवाना असुल गरेको जनाएको छ।
त्यस्तै, राजश्व चुहावट नियन्त्रणतर्फ प्रहरीले रु। ५,४०,४२,४०५ बराबरका अवैध सामग्री बरामद गरेको छ। भन्सार छलीका सामानमध्ये रु. १,६४,५३० बराबरको सामग्रीसहित एक जना पक्राउ गरिएको छ। अवैध वन पैदावारतर्फ २५ क्यूविक फिट सालको काठ र दुई वटा साइकल बरामद गरी रु। १,२५,००० जरिवाना गरिएको छ।

लागू औषध नियन्त्रणअन्तर्गत ७ वटा मुद्दा दर्ता भई १३ जना पक्राउ परेका छन्। प्रहरीका अनुसार १६४ केजी ९६ ग्राम गाँजा, १.८५ ग्राम ब्राउन सुगर र ५१,८०० वटा औषधीजन्य लागू औषध बरामद गरिएको छ। यसैगरी, ३ वटा अवैध हातहतियार तथा ३०० ग्राम बारुद समेत फेला पारिएको छ।
सवारी दुर्घटनातर्फ चैत्र महिनामा ७८ वटा दुर्घटना हुँदा २ जनाको मृत्यु र १२१ जना घाइते भएका छन्। ट्राफिक नियम उल्लंघन गर्ने ९०९ सवारी साधन कारवाहीमा पर्दा रु. ११,५६,००० जरिवाना संकलन गरिएको छ।

घरेलु हिंसासम्बन्धी ६७ वटा उजुरी परेकोमा ६४ वटामा मिलापत्र गराइएको प्रहरीले जनाएको छ। साथै, लागू औषध, आत्महत्या र ट्राफिक सचेतनासम्बन्धी १४२ वटा कार्यक्रम सञ्चालन गरी ३,३५५ जनालाई लाभान्वित गरिएको छ। विद्यालय लक्षित कार्यक्रममार्फत ७७५ विद्यार्थीलाई सचेतना प्रदान गरिएको छ।

कार्यालयका प्रवक्ता प्रहरी नायब उपरीक्षक हरि बहादुर बस्नेत का अनुसार CCTV निगरानी, सामाजिक सञ्जाल अनुगमन तथा नियमित गस्ती परिचालनमार्फत जिल्लाको शान्ति सुरक्षा अवस्था थप सुदृढ बनाइएको छ।

पर्सा, बहुदरमाई, ३ बैशाख २०८३ –  बहुदरमाई नगरपालिका पर्सा अन्तर्गत सामुदायिक विद्यालयहरूमा सञ्चालन हुँदै आएको दिवा खाजा कार्यक्रमको रकम प्रयोगमा अनियमितता भएको आशंका गरिएको छ। आ. व. २०८०-८१ को लेखापरीक्षण प्रतिवेदनमा विद्यार्थी संख्या, उपस्थिति तथा खर्च विवरणबीच स्पष्ट मिलान नभएको उल्लेख गर्दै रकमको पारदर्शिता र सदुपयोगबारे प्रश्न उठाइएको हो।

सरकारले बाल विकासदेखि कक्षा ५ सम्म अध्ययनरत विद्यार्थीहरूका लागि पोषण सुधार गर्ने उद्देश्यले प्रति विद्यार्थी रु. १५ का दरले स्थानीय तहमार्फत दिवा खाजा कार्यक्रम सञ्चालन गर्दै आएको छ।

आ. व. २०८०-८१ को लेखापरीक्षण प्रतिवेदन अनुसार बहुदरमाई नगरपालिका पर्सा ले मदरसा सहित १९ वटा विद्यालयमा १७८ दिनका लागि कुल रु. १,३४,०८,३५० ( एक करोड चौतीस लाख आठ हजार तीन सय पचास रुपैयाँ) निकासा गरेको देखिन्छ। तर उक्त रकम अनुसार सबै विद्यालयमा नियमित रूपमा दिवा खाजा कार्यक्रम प्रभावकारी रूपमा सञ्चालन भएको वा नगरेको विषयमा स्पष्ट प्रमाण उपलब्ध नभएको प्रतिवेदनमा उल्लेख गरिएको छ।

बहुदरमाई नगरपालिकाका नगर प्रमुख सिंगासन साह तेली, उप मेयर सुष्मा कुशवाहा, तत्कालिन प्रमुख प्रशासकिय अधिकृत, प्रमुख लेखापाल, शिक्षा शाखा, सम्बन्धित बिद्यालय लगायत सम्बन्धित कर्मचारीको मिलेमतोमा दिवा खाजाको रु. १ करोड ३४ लाख भन्दाबढी रकम विद्यालयको नाममा निकासा गरी हिनामिना भएको आशंका गरिएको छ |

प्रतिवेदनमा विद्यालयहरूले दैनिक हाजिरी पुस्तिका तथा बिल–भरपाई प्रमाणित गरी पेश गर्नुपर्ने व्यवस्था भए पनि सो प्रक्रिया पूर्ण रूपमा पालना नभएको उल्लेख छ। त्यसैगरी, विद्यालयको हाजिरी अभिलेख र IEMIS  तथ्यांकबीच मिलान नभएको कारण विद्यार्थी संख्या यकिन हुन नसकेको प्रतिवेदनले देखाएको छ। यसले वास्तविक विद्यार्थी संख्या र खर्च विवरणबीच असन्तुलन हुन सक्ने जोखिम बढाएको बताइएको छ।

लेखापरीक्षण प्रतिवेदनले कार्यक्रमको नियमित अनुगमन नहुनु, बिल–भरपाई पर्याप्त रूपमा पेश नगर्नु तथा कार्यक्रम सञ्चालनको निरन्तरता स्पष्ट नभएको जस्ता कमजोरीहरू औंल्याएको छ।

दिवा खाजा कार्यक्रमजस्तो बालबालिकासँग प्रत्यक्ष जोडिएको संवेदनशील योजनामा पारदर्शिता आवश्यक नरहेको भन्दै सरोकारवालाहरूले निष्पक्ष छानबिनको माग गरेका छन्।
लेखापरीक्षण प्रतिवेदन अनुसार प्रत्येक विद्यालयमा स्थलगत अनुगमन गरी वास्तविक विद्यार्थी सहभागिता, हाजिरी अभिलेख तथा तथ्यांक मिलानका आधारमा रकमको यकिन गर्नुपर्ने सुझाव दिएको छ।

बालबालिकाको पोषण सुधारका लागि सञ्चालन गरिएको दिवा खाजा कार्यक्रममै अनियमितताको आशंका देखिएपछि स्थानीय तहको जवाफदेहिता र पारदर्शितामाथि गम्भीर प्रश्न उठेको छ। सम्बन्धित निकायले यथाशीघ्र छानबिन गरी सत्य तथ्य सार्वजनिक गर्नुपर्ने माग बढ्दै गएको छ।

काठमाडौँ, ३ बैशाख २०८३-  नेपालमा पेट्रोलियम पदार्थको निरन्तर मूल्य वृद्धि भईरहेको छ |  नेपाल आयल निगमले इन्धनको मूल्य फेरि वृद्धि गरेको छ।

निगमले बिहीबारदेखि लागू हुने गरी डिजेल र मट्टीतेलको मूल्य प्रतिलिटर ३० रुपैयाँका दरले वृद्धि गरेको छ।

जसअनुसार अब उपत्यकालगायत स्थानमा डिजेल र मट्टीतेलको मूल्य प्रतिलिटर २३७ पुगेको छ। हवाई इन्धन २५६ रुपैया पुगेको छ | पेट्रोलको मूल्य भने यथावत रहेको छ |

काठमाडौँ, २ बैशाख २०८३— अख्तियार दुरुपयोग अनुसन्धान आयोगले लुम्बिनी प्रदेशको भूमि व्यवस्था, कृषि तथा सहकारी मन्त्रालयका तत्कालीन सचिव बैकुण्ठ अधिकारीसहित १६ जनाविरुद्ध भ्रष्टाचार मुद्दा दायर गरेको छ।

आयोगले बिहीबार विशेष अदालत मा मुद्दा दायर गर्दै रूपन्देहीको सम्मरीमाई गाउँपालिकामा शीतभण्डार निर्माणका क्रममा अनियमितता भएको आरोप लगाएको हो।

आरोपपत्र अनुसार आर्थिक वर्ष २०७६-७७ मा वडा नं. ४ सिद्धनाथस्थित शीतभण्डार निर्माण योजनामा सम्झौता विपरीत कार्य नै पूरा नगरी भुक्तानी लिएको पाइएको छ। आयोगका अनुसार उनीहरूमाथि भ्रष्टाचार निवारण ऐन, २०५९ को दफा १७ बमोजिमको कसुरमा कुल ७१ लाख ९७ हजार ९ सय ८० रुपैयाँ बिगो कायम गरिएको छ।

मुद्दा दायर गरिएकामध्ये तत्कालीन सचिव अधिकारीसहित वरिष्ठ कृषि विकास अधिकृत श्रीधर ज्ञवाली, कृषि प्रसार अधिकृत मुकेश रामजाली नेपाली, लेखा अधिकृत लक्ष्मण पौडेल, सह–लेखापाल अजय मिश्र तथा विभिन्न सहकारी संस्थाका पदाधिकारी र व्यवस्थापकहरू रहेका छन्।

आयोगले कैद र जरिवानासहित बिगो असुलउपरको मागदाबी गर्दै मुद्दा दायर गरेको जनाएको छ।

काठमाडौं, २ बैशाख २०८३— सभामुख डोलप्रसाद अर्याल सवार गाडीले लेन उल्लंघन गरेपछि ट्राफिक प्रहरीले कारबाही गरेको छ।

बुधबार थापाथली क्षेत्रमा अर्याल चढेको गाडीसहित अगाडि–पछाडि रहेका अन्य गाडीहरूलाई पनि ट्राफिक प्रहरीले रोकेर कारबाही गरेको हो। ट्राफिक प्रहरी स्रोतका अनुसार लेन क्रस गरी ट्राफिक नियम उल्लंघन गरेकाले चिट काटिएको हो।

घटनापछि ट्राफिक प्रहरी सिंहदरबार पुगेर थप प्रक्रिया अघि बढाएको थियो। स्रोतका अनुसार तीन वटा गाडीलाई चिट काटिएको छ।