उत्सव खबर

काठमाडौं २७ भदौ : अन्तरिम सरकार गठन गर्ने प्रक्रिया संसद विघटनको विषयमा देखिएको मतभेदका कारण जटिल बनेको छ। पूर्वप्रधानन्यायाधीश सुशीला कार्कीले प्रतिनिधिसभा विघटनपछि मात्र प्रधानमन्त्रीको शपथ लिनु पर्ने अडान राखेकी छिन् भने राष्ट्रपति रामचन्द्र पौडेल भने संविधानको प्रावधान विपरीत कदम चाल्न नहुने पक्षमा उभिएका छन्। अन्तरिम सरकारको नेतृत्व लिन तयार भएकी पूर्वप्रधानन्यायाधीश सुशीला कार्कीले जेनजी आन्दोलनका नेता सुदन गुरुङको आडमा प्रतिनिधिसभा विघटनलाई ‘बटमलाइन’ बनाएकी छन्।
उच्च सुरक्षा स्रोतका अनुसार राष्ट्रपति, प्रधानसेनापति र आन्दोलनकारी शक्तिबीच भएको त्रिपक्षीय वार्तामा कार्की र गुरुङले संसद विघटन गर्नै पर्ने अडान मजबुत रुपमा अघि सारेका छन्। अहिले प्रधानमन्त्रीको शपथको विषय पनि संसद विघटनको विवादकै कारण अड्किएको बताइएको छ।

उच्च स्रोतका अनुसार राष्ट्रपति, प्रधानसेनापति अशोकराज सिग्देल र जेनजी आन्दोलनका नेता सुदन गुरुङबीच भएको त्रिपक्षीय वार्तामा संसद विघटनलाई ‘बटमलाइन’ बनाएर अघि बढ्ने रणनीति प्रस्तुत गरिएको थियो। कार्की र गुरुङ दुवै पक्षबाट संसद विघटनलाई अनिवार्य शर्तको रुपमा अघि सारिएको बताइएको छ।

तर संविधानको धारा अनुसार प्रधानमन्त्रीको सिफारिसबिनै संसद विघटन सम्भव छैन। यसअघि २०७७ र २०७८ सालमा तत्कालीन प्रधानमन्त्री केपी शर्मा ओलीको सिफारिसपछि मात्र तत्कालीन राष्ट्रपति विद्यादेवी भण्डारीले प्रतिनिधिसभा विघटन गरेकी थिइन्। यही संवैधानिक बाध्यताका कारण राष्ट्रपति पौडेल तत्काल कदम चाल्न हिच्किचाइरहेका छन्।

स्रोतका अनुसार विवादको मुख्य प्रश्न “पहिले संसद विघटन गर्ने कि पहिले प्रधानमन्त्री नियुक्त गर्ने” भन्नेमा अड्किएको छ। कार्की संसद विघटनपछि मात्रै शपथ खान तयार देखिएकी छिन् भने पौडेल संविधानबमोजिम शपथपछि मात्र विघटन प्रक्रियामा जानुपर्ने तर्क गरिरहेका छन्।

यो विवादले सेनालाई समेत दबाबमा पारेको छ। प्रमुख सेनापति सिग्देलले आफ्ना वरिष्ठ जर्नेलहरूसँग छलफल गरी परिस्थितिको सम्भावित असरबारे राष्ट्रपति निवास शीतल निवासमा रिपोर्ट गरेको बताइएको छ।

काठमाडौं २६ भदौ – नेपाली कांग्रेसका महामन्त्री गगनकुमार थापाले जेन जी पुस्ता प्रदर्शनको क्रममा देशको सम्पत्ति जलाउनेहरूमाथि कठोर कानुनी कारबाही गर्नुपर्ने बताएका छन्। बिहीबार एक भिडियो सन्देशमार्फत उनले भदौ २३ र २४ गतेका घटनाको निष्पक्ष छानबिन गर्न शक्तिशाली आयोग गठन गर्नुपर्ने आवश्यकता रहेको बताएका छन्।

महामन्त्री थापाले भने, “नयाँ सरकारले शक्तिशाली कानुन बनाएर छानबिन गर्नुपर्छ। ममाथि पनि छानबिन होस्। अकुत सम्पत्तिलाई राष्ट्रियकरण गर्नुपर्छ। तर, भदौ २३ र २४ गतेका घटनाका दोषीलाई कारबाहीमा तान्नैपर्छ।”

उनले वर्तमान संविधानलाई नागरिकको ठूलो उपलब्धि भन्दै यसको मर्मलाई नमार्न जेन जी पुस्तालाई आग्रह गरे। आवश्यक परे सुधार र परिवर्तन गर्न सकिने तर संविधानको आत्मालाई सुरक्षित राख्नुपर्ने उनको भनाइ छ।

थापाले कांग्रेसलाई जनताले मन पराउने पार्टी बनाउन आफूहरू कटिबद्ध रहेको उल्लेख गर्दै भने, “हामी कांग्रेसलाई बदल्न लाग्छौं। जेनजीले मन पराउने पार्टी बनाउँछौं। तर संविधानको मर्म नमारिकन मात्र परिवर्तन गर्नुपर्छ।”

त्यसैगरी उनले सबैलाई एउटै काँधमा राखेर दोषी बनाउने प्रवृत्तिको विरोध गर्दै भने, “दूधको दूध, पानीको पानी हुनैपर्छ। भोलि देश चलाउनुपर्ने भएकाले सबैलाई एउटै काँधमा नराखौँ।”

महामन्त्री थापाले ब्याकबेन्चमा बसेर सरकारलाई आवश्यक सहयोग गर्न आफू तयार रहेको पनि स्पष्ट पारे।

२५ भदौ, काठमाडौं — राजधानीस्थित जंगीअड्डामा बुधबार भएको जेनजी प्रतिनिधिहरू र नेपाली सेनाबीचको महत्वपूर्ण बैठकमा पूर्वप्रधानन्यायाधीश शुशीला कार्कीको नेतृत्वमा ‘नागरिक सरकार’ गठन गर्ने प्रस्ताव अघि सारिएको छ।

बैठकमा उपस्थित स्रोतका अनुसार जेनजी प्रतिनिधिहरूले कार्कीको नाम सेनाका प्रमुख अशोकराज सिग्देलसमक्ष पठाएका छन्। एक उच्च सैनिक अधिकृतले भने, “उहाँहरूले सम्माननीयज्यूको नाम अगाडि सारेका छन्, तर अझै अर्को समूहसँग पनि छलफल भइरहेको छ।” सेनाले कार्कीसँग प्रत्यक्ष संवाद गर्ने तयारीसमेत गरेको जनाइएको छ।

यसअघि, जेनजी युवाहरूले सामाजिक सञ्जाल डिस्कर्डमा नेतृत्व चयनबारे दिनभर छलफल गरेका थिए। उक्त छलफलमा कार्कीको पक्षमा बलियो समर्थन देखिएको स्रोतले जनाएको छ। तर, धेरै युवाहरूले काठमाडौं महानगरका मेयर बालेन शाहको नाम पनि अघि सारेका थिए। तथापि, शाहसँग प्रत्यक्ष सम्पर्क हुन नसकेका कारण उनको प्रस्ताव अघि बढ्न सकेन।

मंगलबार बेलुकी बालेन शाहले सामाजिक सञ्जालमा स्टाटस लेख्दै जेनजीलाई सेना प्रमुखसँग वार्ताका लागि तयार रहन आग्रह गरेका थिए। त्यसअनुसार बुधबार बिहान जेनजी प्रतिनिधिहरू जंगीअड्डा पुगेका थिए। तर, छलफलका लागि १५ जनाभन्दा बढी प्रतिनिधि उपस्थित भएपछि सेना प्रमुख सिग्देलले उनीहरूलाई “पहिले आपसमा सहमति गरेर संयोजक तोकेर आउन” सुझाव दिएका थिए।

सोही क्रममा जंगीअड्डाकै एउटा कोठामा जेनजी प्रतिनिधिहरूबीच आन्तरिक बैठक बसेको थियो। बैठकमा केही सदस्यहरूले गणतान्त्रिक व्यवस्थामाथि प्रश्न उठाउँदै वैकल्पिक प्रस्तावसमेत राखेका थिए। यस विषयमा मतभेद बढेपछि रक्षा बमसमेतको समूह बैठकबाट बाहिरिएको थियो।

अन्ततः, लामो छलफलपछि शुशीला कार्कीको नेतृत्वमा नागरिक सरकार गठन गर्ने सहमति जेनजी प्रतिनिधिहरूबीच बनेको स्रोतले पुष्टि गरेको छ। अब यो प्रस्ताव सेनाले थप छलफलका लागि औपचारिक रूपमा अघि बढाउने बताइएको छ।

काठमाडौं, भाद्र २४ –नेपाली सेनाले तत्काल लुटपाट, आगजनी लगायतका कार्य रोक्न आग्रह गरेको छ। सेनाले विषम परिस्थितिको फाइदा उठाउँदै भइरहेका लुटपाट, आगजनी र सार्वजनिक सम्पत्ति तोडफोडजस्ता अराजक गतिविधि तत्काल नरोकिए आज (भाद्र २४ गते) राति १० बजेबाट सेनासहित सम्पूर्ण सुरक्षा निकाय तैनाथ हुने जनाएको छ।

सेनाको जनसम्पर्क तथा सूचना निर्देशनालयले मंगलबार साँझ एक विज्ञप्ति जारी गर्दै यदि यस्ता गतिविधि रोकिएनन् भने आज (भाद्र २४ गते) राति १० बजेबाट सेनासहित सम्पूर्ण सुरक्षा निकाय तैनाथ हुने संकेत दिएको हो।

विज्ञप्तिमा भनिएको छ, “हालको विषम परिस्थितिको अनुचित फाइदा उठाई केही समूहहरूले सर्वसाधारण नागरिक तथा सार्वजनिक सम्पत्तिमा अत्यधिक क्षति पु¥याउने, लुटपाट एवम् आगजनी गर्ने कार्य भइरहेको हुँदा यस किसिमका गतिविधिहरू नगर्न/नगराउन नेपाली सेना पुनः आग्रह गर्दछ।”

सेनाले यस्ता अराजक गतिविधि नरोकिएमा नेपाल र नेपालीको सुरक्षाका लागि आफ्नो प्रमुख जिम्मेवारी पूरा गर्न दृढ रहेको स्पष्ट पारेको छ। सेनाले भनेको छ, “यस किसिमका गतिविधिहरू नरोकिएको खण्डमा नेपाली सेना लगायत सम्पूर्ण सुरक्षा निकायहरू आफ्नो प्रमुख जिम्मेवारी नेपाल र नेपालीको सुरक्षाका लागि स्थिति नियन्त्रण गर्न मिति २०८२ भाद्र २४ गते राति १० बजेबाट दृढ रहने प्रतिबद्धता जानकारी गराउँदछौं।”

सेनाले स्थितिलाई नियन्त्रणमा लिने क्रममा सम्पूर्ण राष्ट्रवासीलाई सहयोग गर्न हार्दिक अपिल पनि गरेको छ। साथै, राति १० बजेपछिको अवस्थाको पुनर्मूल्याङ्कन गरी थप सूचना जारी गरिने विज्ञप्तिमा उल्लेख गरिएको छ।

काठमाडौं, २४ भदौ : सुरक्षा निकायका प्रमुख र मुख्यसचिवले प्रधानमन्त्रीले राजीनामा स्वीकृत भइसकेकाले संयमित हुन आग्रह गरेका छन्।

जनकपुरधाम, २४ भदौ :-जेन–जी पुस्ताले देशभर आह्वान गरेको आन्दोलनका क्रममा प्रदर्शनकारीको ज्यान गएपछि मधेश प्रदेशका मुख्यमन्त्री सतिश कुमार सिंहले आज आफ्नो पदबाट राजीनामा दिएका छन्।

सामाजिक संजालबाट राजीनामा घोषणा गर्दै सिंहले आन्दोलनका क्रममा प्रदर्शनकारीले ज्यान गुमाउनु अत्यन्त पीडादायी भएको बताउँदै दिवंगत आत्माप्रति श्रद्धाञ्जली अर्पण गरेका छन्। साथै, घाइतेहरूको शीघ्र स्वास्थ्यलाभको कामना गरेका छन्।

सिंहले भनेका छन्,

“जनताको विश्वास र मतबाट निर्वाचित भएर जनप्रतिनिधि बन्नु मेरो जीवनकै ठूलो गौरव थियो। तर नागरिककै जीवन सुरक्षित गर्न नसकिएको वर्तमान परिस्थितिले मलाई आत्मसम्मानपूर्वक यो निर्णय लिन बाध्य बनाएको हो। नागरिकको ज्यान भन्दा ठूलो अरु केही छैन भन्ने अटल विश्वासका साथ, जनताको अधिकार र भविष्यप्रति उत्तरदायी हुँदै म मधेश प्रदेशको मुख्यमन्त्री पदबाट राजीनामा गर्दछु।”

उनले संविधानले प्रदान गरेको शान्तिपूर्ण आन्दोलनको अधिकारलाई सम्मान गर्दै समस्या समाधानको एक मात्र बाटो संवाद, आपसी समझदारी र सहकार्य नै भएको उल्लेख गरेका छन्।

मुख्यमन्त्री सिंहले आफ्नो कार्यकालमा साथ दिने सम्पूर्ण सहयोगी, जनप्रतिनिधि, सरोकारवाला निकाय, तथा जनमत पार्टीका राष्ट्रिय अध्यक्ष डा. सिके राउत लगायत सबै नेता, कार्यकर्ता र समितिप्रति आभार प्रकट गरेका छन्।

काठमाडौं, २४ भदौ : नेपाली कांग्रेसका महामन्त्री गगनकुमार थापा निवासमा आगजनी गरिएको छ। रातोपुलस्थित थापाको निवासमा प्रदर्शनकारीले आगजनी गरेका हुन्। यसरी शेर बहादुर देउवा, ररघुबीर महासेठ, रमेश लेखक, पुष्प कमल दाहाल प्रचण्ड, दिपक खडका लगायत कयौ नेताको घरमा प्रदर्शनकारीले तोडफोड तथा आगजनी गरेका छन् |  काठमाडौँ लगायत पोखरा, इटहरी, बुटवल, हेटौडा,जनकपुर र बिरगंज लगायतका ठाउमा अहिले जेन जी पुस्ता समर्थकले सरकारको बिरोधमा प्रदर्शन गरिरहेका छन | प्रदर्शनको क्रममा २० युवाको ज्यान गइसकेको छ | सरकारमा रहेका मन्त्रीहरु धमाधम राजिनामा दिदै छन |