उत्सव खबर

काठमाडौँ, ८ पुस — राष्ट्रपति रामचन्द्र पौडेलसँग नेपालस्थित चिनियाँ राजदूत छन् सोङले शिष्टाचार बिदाइ भेट गर्नुभएको छ। राष्ट्रपति कार्यालयमा भएको भेटमा नेपाल–चीन द्विपक्षीय सम्बन्ध, आपसी हित तथा चासोका विविध विषयमा छलफल भएको राष्ट्रपति कार्यालयले जनाएको छ।
राष्ट्रपति कार्यालयका प्रवक्ता प्रदीपकुमार कोइरालाका अनुसार भेटका क्रममा दुवै देशबीच रहिआएको मैत्रीपूर्ण सम्बन्धलाई थप सुदृढ बनाउने विषयमा कुराकानी भएको थियो।
बिदाइ भेटका अवसरमा राष्ट्रपति पौडेलले राजदूत छन् सोङले आफ्नो कार्यकाल सफलतापूर्वक सम्पन्न गर्नुभएकोमा धन्यवाद व्यक्त गर्दै नेपाल–चीन सम्बन्ध सुदृढीकरणमा उहाँले पुर्‍याउनुभएको योगदानको प्रशंसा गर्नुभयो। साथै उहाँले राजदूत सोङको भावी जीवन र कार्यकालका लागि शुभकामना व्यक्त गर्नुभयो।

काठमाडौं, ८ पुस-  राष्ट्रपति रामचन्द्र पौडेलले विघटित प्रतिनिधिसभाका प्रमुख तीन दलका शीर्ष नेताहरूसँग छलफल गर्ने भएका छन् । राष्ट्रपति पौडेलले मंगलबार नेपाली कांग्रेस, नेकपा एमाले र नवगठित नेपाली कम्युनिस्ट पार्टीका शीर्ष नेताहरूसँग छलफल गर्न लागेका हुन् ।

राष्ट्रपतिको कार्यालयका अनुसार आज दिउँसो ३ बजे कांग्रेस सभापति शेरबहादुर देउवा, एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’सँग छलफल हुने कार्यक्रम तय भएको छ ।
तर, राष्ट्रपति कार्यालयले पूर्वप्रधानमन्त्रीसंग हुन लागेको छलफलको एजेन्डाबारे भने कुनै जानकारी सार्वजनिक गरेको छैन । छलफलको विषयवस्तु गोप्य राखिए पनि समसामयिक राजनीतिक अवस्थाबारे विचार–विमर्श हुने अनुमान गरिएको छ ।

काठमाडौं, ७ पुस- राष्ट्रिय मानव अधिकार आयोगले भदौ २३ र २४ गते भएका घटनाका सम्बन्धमा काठमाडौं महानगरपालिकाका मेयर बालेन शाहसँग सोधपुछ गरेको छ।
आयोगले तोकेको अनुसन्धान अधिकृतको टोलीले जेनजी आन्दोलनका क्रममा मेयर शाहले सामाजिक सञ्जालमार्फत व्यक्त गरेका अभिव्यक्ति तथा त्यससँग सम्बन्धित अन्य घटनाक्रमबारे जानकारी लिएको हो।
राष्ट्रिय मानव अधिकार आयोगका प्रवक्ता टिकाराम पोखरेलले आयोगले उक्त घटनाबारे अनुसन्धान गरिरहेको जानकारी दिँदै त्यसैक्रममा विभिन्न व्यक्तिहरूलाई बोलाएर सोधपुछ गरिएको बताए। सोमबार भएको सोधपुछका विषयमा भने उनले कुनै व्यक्तिको नाम उल्लेख नगरी आफूलाई यकिन नभएको प्रतिक्रिया दिए।
आयोगका अनुसार भदौ २३ र २४ गतेको घटनामा मानव अधिकार उल्लङ्घन भए–नभएको विषयमा तथ्य संकलन तथा अध्ययन भइरहेको छ। अनुसन्धान सम्पन्न भएपछि आवश्यक निष्कर्षसहित आयोगले थप कदम चाल्ने बताएको छ |

काठमाडौँ ७ पुस – राष्ट्रिय स्वतन्त्र पार्टी (रास्वपा) का सभापति रवि लामिछानेले नेकपा एमालेका अध्यक्ष केपी शर्मा ओलीले आफूमाथि लगाएको ‘गुन’ अदालत धाएर तिर्दै आएको टिप्पणी गरेका छन्।

सोमबार काठमाडौं जिल्ला अदालतमा तारिख बुझाएर फर्कने क्रममा सञ्चारकर्मीहरूसँग कुरा गर्दै लामिछानेले ओलीको अभिव्यक्तिप्रति व्यंग्य गरेका हुन्। अदालत परिसरबाट बाहिरिँदै उनले भने, “केपी ओलीजीले मलाई ठूलो गुन लगाएको छु भन्नुभएको रहेछ। उहाँले कहाँ–कहाँ गुन लगाउनुभएको छ, अब यो जिन्दगीभर गुन तिर्दै जानुपर्ने छ।”
आफूमाथि लागेका विभिन्न मुद्दाहरूको सन्दर्भ जोड्दै लामिछानेले अदालत धाउनु नै ‘गुन तिर्ने प्रक्रिया’ जस्तो भएको बताए। उनले भने, “अरूलाई त मलाई जस्तो मुद्दा लाग्दैन। म सायद सबैभन्दा धेरै मुद्दा लागेको मान्छे हुन सक्छु। गुन तिर्ने क्रममा आज काठमाडौं जिल्ला अदालत हाजिर हुन आएँ। अब ओलीको गुन तिर्न सबै जिल्लामा जानुपर्ने छ।”
केही दिनअघि दिएको एक अन्तर्वार्तामा एमाले अध्यक्ष ओलीले रवि लामिछानेलाई आफूले विगतमा गुन लगाएको तर लामिछानेले अनावश्यक दुश्मनी गरेको आरोप लगाएका थिए। ओलीले भनेका थिए, “मैले रवि लामिछानेलाई गुन लगाएको थिएँ। उनले मसँग अनावश्यक दुश्मनी गरे। किन गरे थाहा छैन, भेट हुँदा सोध्छु।”
उही अन्तर्वार्तामा ओलीले आगामी निर्वाचनमा नयाँ राजनीतिक दलहरूको खासै प्रभाव नहुने दाबी पनि गरेका थिए। हर्क साम्पाङ, बालेन शाह, रवि लामिछाने र कुलमान घिसिङहरू मिले पनि चौथो वा पाँचौँ शक्ति पनि बन्न नसक्ने उनको टिप्पणी थियो। उनले नयाँ शक्तिहरूलाई ‘सूर्य टिपेर खान खोज्ने बच्चा’सँग तुलना गर्दै उनीहरूको हैसियत दशौँ–बाह्रौँ स्थानसम्म सीमित हुने दाबी गरेका थिए।
लामिछाने सोमबार काठमाडौं जिल्ला अदालतमा तारिख बुझाउन पुगेका थिए। हिरासतबाट रिहा भएपछि उनीविरुद्ध विभिन्न जिल्लामा विचाराधीन मुद्दाहरू रहेकाले ती मुद्दासम्बन्धी तारिख र अदालती प्रक्रियाका लागि विभिन्न अदालतमा उपस्थित हुनुपर्ने अवस्था छ।

पर्सा, ६ पुस – पर्साको जिराभवानी गाउँपालिकाका अध्यक्ष अनोज चौधरीले सरकारले गरेका प्रमुख प्रशासकीय अधिकृत सरुवा निर्णय मान्न अस्वीकार गर्दै ठाडै चुनौती दिएका छन्। संघ सरकारको सामान्य प्रशासन मन्त्रालयले गत मंगलबार कालिकामाई गाउँपालिकामा कार्यरत अमित गिरिलाई जिराभवानी पठाएर वर्तमान अधिकृत राज कुशवाहालाई कालिकामाई सरुवा गरेको थियो। अध्यक्ष चौधरीले आफ्नो सहमति बिना गरिएको सरुवालाई अस्वीकृत गर्दै फेसबुकमार्फत सरकारलाई चेतावनी दिएका छन्।

चौधरीले चाहेको कर्मचारीको सट्टा गिरिलाई सरकारले सरुवा गरेर पठाएको झोँकमा अध्यक्षले अमित गिरिलाई आफ्नो पालिकामा सरकारले सरुवा गर्ने निर्णय नमान्ने समेत बताएका छन् ।

तर गाउँपालिकाका उपाध्यक्ष र पाँच वटै वडाका अध्यक्षसहित अन्य जनप्रतिनिधिहरूले गिरिको सरुवालाई समर्थन गरेका छन्। कार्यपालिकाका एक सदस्यका अनुसार, गिरि पहिले पनि डेढ वर्षअघि जिराभवानीमा प्रमुख प्रशासकीय अधिकृत थिए र कार्यालयको कामकाजमा प्रभावकारी योगदान दिएका थिए। हालको सरुवासँग अध्यक्ष चौधरी असन्तुष्ट भए पनि अन्य जनप्रतिनिधिहरूले कार्यालयको कामकाज सहज बनाउन गिरिको पुन: नियुक्ति आवश्यक रहेको बताएका छन्।

चितवन, ५ पुस — राष्ट्रिय स्वतन्त्र पार्टी (रास्वपा) का सभापति रवि लामिछानेले देश निर्माणका लागि आफू जुनसुकै त्याग गर्न तयार रहेको बताएका छन्। सहकारी ठगीसम्बन्धी मुद्दामा धरौटीमा रिहा भएपछि चितवनमा आयोजित पार्टी सभालाई सम्बोधन गर्दै उनले व्यक्तिगत पद, शक्ति वा स्वार्थभन्दा देश ठूलो भएको स्पष्ट पारे।

पार्टी एकता र सहकार्यका विषयमा बोल्दै उनले अन्तिम समयमा मिल्नुपर्ने सबै शक्ति मिलेरै अघि बढ्ने विश्वास व्यक्त गरे। आफू एक चुनावका लागि होइन, एउटा पुस्ताको भविष्य बदल्न राजनीतिमा आएको उनको भनाइ थियो।
उनले सरकारलाई समयमै निर्वाचन गराउन आग्रह गर्दै जेन–जीका सपना पूरा गर्न रास्वपा सरकारसँगै उभिने बताए। साथै, जेन–जीलाई निराश नहुन आग्रह गर्दै आफू सधैं साथमा रहेको सन्देश दिएका छन।

बुटवल, ३ पुस। उच्च अदालत तुलसीपुरको बुटवल इजलासले राष्ट्रिय स्वतन्त्र पार्टीका सभापति रवि लामिछानेलाई सम्भावित बिगो रकम स्वीकार गरी थुनामुक्त गर्न आदेश दिएको छ। न्यायाधीशद्वय बासुदेव आचार्य र तेजनारायण पौडेलको इजलासले २०८२ साउन २६ गते जिल्ला अदालत रुपन्देहीले जमानत लिन अस्वीकार गरेको आदेश बदर गर्दै बैंक जमानत र धरौटी स्वीकार गर्न निर्देशन दिएको हो।

उच्च अदालतले लामिछानेले पेस गरेको दुई करोड ७४ लाख रुपैयाँ बराबरको बैंक ग्यारेन्टी सुरक्षित गर्न तथा यसअघि २०८१ माघमा बुझाएको एक करोड रुपैयाँ धरौटी पनि स्वीकार गर्न जिल्ला अदालतलाई आदेश दिएको छ। आदेशमा भनिएको छ, “रवि लामिछानेले बिगोको हकमा दामासाहीले हुने रकम जमानत दिई बचतकर्ताको बिगो प्राप्त गर्ने सुनिश्चितता गरेको देखियो। बचतकर्ता तथा लगानीकर्ताको रकम सुनिश्चितता नै पहिलो प्राथमिकता देखिँदा निजले दिएको बैंक जमानत स्वीकार गरी मुद्दाको कारबाही अगाडि बढाउनू।”

उच्च अदालतले सुप्रिम सहकारीबाट रवि लामिछाने कार्यरत गोर्खा मिडियामा प्रवाह भएको रकममध्ये दामासाही हिसाबले पर्ने बिगो बैंक ग्यारेन्टीमार्फत सुनिश्चित गर्न खोजिएकाले त्यसलाई स्वीकार गर्नुपर्ने स्पष्ट गरेको छ। साथै, लामिछाने व्यक्तिगत वा संस्थागत रूपमा विदेश यात्रा गर्नुपर्ने भए अदालतलाई पूर्व जानकारी दिनुपर्ने सर्त तोकिएको छ। मूल मुद्दाको अन्तिम फैसलामा ठहर भएबमोजिम थप बिगो रकम तिर्नुपर्ने अवस्था आएमा त्यसमा मञ्जुर भएको कागज गराई थुनामुक्त गर्न पनि आदेशमा उल्लेख छ।

त्यसैगरी, उच्च अदालतले छविलाल जोशीको हकमा सक्कल प्रमाणसहित निवेदन परेमा उनलाई थुनामा राख्ने विषयमा पुनर्विचार गर्नसमेत जिल्ला अदालतलाई निर्देशन दिएको छ। यसअघि २०८१ माघ १३ गते जिल्ला अदालत रुपन्देहीले सुप्रिम सहकारी ठगी प्रकरणमा मुछिएका रवि लामिछानेसँग एक करोड रुपैयाँ धरौटी माग गरेको थियो, जुन रकम बुझाएर उनी थुनामुक्त भएका थिए।