उत्सव खबर 
Raju Sah
काठमाडौँ ७ पुस – राष्ट्रिय स्वतन्त्र पार्टी (रास्वपा) का सभापति रवि लामिछानेले नेकपा एमालेका अध्यक्ष केपी शर्मा ओलीले आफूमाथि लगाएको ‘गुन’ अदालत धाएर तिर्दै आएको टिप्पणी गरेका छन्।
सोमबार काठमाडौं जिल्ला अदालतमा तारिख बुझाएर फर्कने क्रममा सञ्चारकर्मीहरूसँग कुरा गर्दै लामिछानेले ओलीको अभिव्यक्तिप्रति व्यंग्य गरेका हुन्। अदालत परिसरबाट बाहिरिँदै उनले भने, “केपी ओलीजीले मलाई ठूलो गुन लगाएको छु भन्नुभएको रहेछ। उहाँले कहाँ–कहाँ गुन लगाउनुभएको छ, अब यो जिन्दगीभर गुन तिर्दै जानुपर्ने छ।”
आफूमाथि लागेका विभिन्न मुद्दाहरूको सन्दर्भ जोड्दै लामिछानेले अदालत धाउनु नै ‘गुन तिर्ने प्रक्रिया’ जस्तो भएको बताए। उनले भने, “अरूलाई त मलाई जस्तो मुद्दा लाग्दैन। म सायद सबैभन्दा धेरै मुद्दा लागेको मान्छे हुन सक्छु। गुन तिर्ने क्रममा आज काठमाडौं जिल्ला अदालत हाजिर हुन आएँ। अब ओलीको गुन तिर्न सबै जिल्लामा जानुपर्ने छ।”
केही दिनअघि दिएको एक अन्तर्वार्तामा एमाले अध्यक्ष ओलीले रवि लामिछानेलाई आफूले विगतमा गुन लगाएको तर लामिछानेले अनावश्यक दुश्मनी गरेको आरोप लगाएका थिए। ओलीले भनेका थिए, “मैले रवि लामिछानेलाई गुन लगाएको थिएँ। उनले मसँग अनावश्यक दुश्मनी गरे। किन गरे थाहा छैन, भेट हुँदा सोध्छु।”
उही अन्तर्वार्तामा ओलीले आगामी निर्वाचनमा नयाँ राजनीतिक दलहरूको खासै प्रभाव नहुने दाबी पनि गरेका थिए। हर्क साम्पाङ, बालेन शाह, रवि लामिछाने र कुलमान घिसिङहरू मिले पनि चौथो वा पाँचौँ शक्ति पनि बन्न नसक्ने उनको टिप्पणी थियो। उनले नयाँ शक्तिहरूलाई ‘सूर्य टिपेर खान खोज्ने बच्चा’सँग तुलना गर्दै उनीहरूको हैसियत दशौँ–बाह्रौँ स्थानसम्म सीमित हुने दाबी गरेका थिए।
लामिछाने सोमबार काठमाडौं जिल्ला अदालतमा तारिख बुझाउन पुगेका थिए। हिरासतबाट रिहा भएपछि उनीविरुद्ध विभिन्न जिल्लामा विचाराधीन मुद्दाहरू रहेकाले ती मुद्दासम्बन्धी तारिख र अदालती प्रक्रियाका लागि विभिन्न अदालतमा उपस्थित हुनुपर्ने अवस्था छ।