उत्सव खबर 
वीरगंज, ३ पुस – राजस्व छलेर भित्र्याइएको आशंकामा प्रहरीले वीरगन्जबाट करिब ४ करोड ७७ लाख ४० हजार रुपैयाँ बराबरको १८०० बोरा सुपारी बरामद गरेको छ। वीरगन्ज महानगरपालिका–२ बाइपास सडकस्थित निशान्त रनावतको उद्योगको गोदाम तथा गोदाम अगाडि रोकिराखिएका ना ७ ख ७४२० र ना ४ ख ६८३२ नम्बरका दुई कन्टेनर गाडीबाट बिहीबार सुपारी बरामद गरिएको हो।
तेस्रो मुलुकबाट वीरगन्ज भन्सार नाका हुँदै भित्र्याइएको सुपारी महोत्तरी पठाउनुपर्ने कागजात भए पनि कन्टेनर खोलेर गोदाममा भण्डारण गरिएको अवस्थामा शंकास्पद देखिएपछि प्रहरीले छापा मारेको पर्साका प्रहरी उपरीक्षक सुदिपराज पाठकले जानकारी दिए। बरामद सुपारीमध्ये ९०० बोरा कन्टेनरबाट र ९०० बोरा गोदामभित्रबाट फेला परेको हो।
पक्राउ परेका कन्टेनर चालक बाराको जीतपुरसिमरा उपमहानगरपालिका–२० का ४१ वर्षीय रामभरोस महरा र वडा नम्बर १९ का ५१ वर्षीय रामप्रसाद यादवलाई नियन्त्रणमा लिइएको छ। बरामद सुपारी र कन्टेनर गाडी आवश्यक अनुसन्धान तथा कारबाहीका लागि राजस्व अनुसन्धान कार्यालयमा बुझाइएको पर्सा प्रहरीले जनाएको छ।