देशका लागि जुनसुकै त्याग गर्न तयार छु : रवि लामिछाने

124

चितवन, ५ पुस — राष्ट्रिय स्वतन्त्र पार्टी (रास्वपा) का सभापति रवि लामिछानेले देश निर्माणका लागि आफू जुनसुकै त्याग गर्न तयार रहेको बताएका छन्। सहकारी ठगीसम्बन्धी मुद्दामा धरौटीमा रिहा भएपछि चितवनमा आयोजित पार्टी सभालाई सम्बोधन गर्दै उनले व्यक्तिगत पद, शक्ति वा स्वार्थभन्दा देश ठूलो भएको स्पष्ट पारे।

पार्टी एकता र सहकार्यका विषयमा बोल्दै उनले अन्तिम समयमा मिल्नुपर्ने सबै शक्ति मिलेरै अघि बढ्ने विश्वास व्यक्त गरे। आफू एक चुनावका लागि होइन, एउटा पुस्ताको भविष्य बदल्न राजनीतिमा आएको उनको भनाइ थियो।
उनले सरकारलाई समयमै निर्वाचन गराउन आग्रह गर्दै जेन–जीका सपना पूरा गर्न रास्वपा सरकारसँगै उभिने बताए। साथै, जेन–जीलाई निराश नहुन आग्रह गर्दै आफू सधैं साथमा रहेको सन्देश दिएका छन।