अन्तर्राष्ट्रिय

भारत, २६ कार्तिक — भारतका विभिन्न राज्यहरूमा पछिल्ला चार दिनभित्र चार जना चिकित्सक आतंक गतिविधिमा संलग्न रहेको आरोपमा पक्राउ परेका छन्। तिनीहरुबाट राइफल र पिस्तोल बरामद गरिएको छ भने केहीको प्रयोगशालाबाट विष बनाउने रासायनिक पदार्थ भेटिएको भारतीय प्रहरीले जनाएको छ।

सुरक्षास्रोतका अनुसार यी सबै चिकित्सकहरू विदेशी आतंकवादी संगठनहरूको निर्देशनमा सक्रिय थिए। जम्मु–कश्मीर, हरियाणा, उत्तर प्रदेश र गुजरातमा एकपछि अर्को गरी गरिएको विशेष कारबाहीमा चिकित्सकसहित उनका सहयोगीहरू पक्राउ परेका हुन्। उनीहरूबाट करिब २९ सय किलो अमोनियम नाइट्रेट, राइफल, पिस्तोल, र बम बनाउने उपकरणहरू बरामद भएका छन्। भारतीय अधिकारीहरूले यसलाई ‘सेतो कॉलर आतंक’ — अर्थात् शिक्षित पेशेवर वर्गभित्र फैलिँदै गएको नयाँ प्रकारको आतंक गतिविधि — का रूपमा व्याख्या गरेका छन्।

जम्मु–कश्मीरका डा. अदिल अहमद रदर सहारनपुर (उत्तर प्रदेश) बाट पक्राउ परेका हुन्। उनको व्यक्तिगत लककरबाट AK–47 राइफल बरामद भएको प्रहरीले जनाएको छ। उनी जैश–ए–मोहम्मद र अन्सार गजवत–उल–हिन्द जस्ता आतंकी समूहसँग सम्बन्धित रहेको आशंका गरिएको छ।

त्यस्तै, हरियाणाका डा. मुजम्मिल शाकिलको कोठाबाट २९ सय किलो अमोनियम नाइट्रेट र हतियार भेटिएपछि उनलाई पक्राउ गरिएको हो। उनी अल फलाह विश्वविद्यालयमा कार्यरत थिए र अन्य चिकित्सकहरूसँग प्रत्यक्ष सम्पर्कमा रहेको प्रारम्भिक अनुसन्धानले देखाएको छ।

सोही घटनासँग सम्बन्धित महिला चिकित्सक डा. शाहिन शाहिदलाई पनि फरीदाबादबाट पक्राउ गरिएको छ। अनुसन्धानअनुसार उनले मुजम्मिलसँग सहकार्य गर्दै हतियार ढुवानीमा संलग्नता जनाएकी थिइन्।

गुजरातमा पक्राउ परेका डा. अहमद मोहियुद्दिन सैयदले ‘राइसिन’ नामक घातक विष तयार गरेको आरोप लागेको छ। उनले दिल्ली र अहमदाबादका भीडभाडयुक्त स्थानहरूमा आक्रमण योजना बनाइरहेको दाबी गरिएको छ।

यी चारै जना पक्राउपछि भारतीय सुरक्षा निकायहरू उच्च सतर्कतामा रहेका छन्। अनुसन्धानमा संलग्न एक अधिकारीका अनुसार, “अब यो केवल सीमापार आतंकको कुरा होइन, शिक्षित वर्गभित्र लुकेको नयाँ खतरा हो।”भनेका छन् |

देइर अल–बालाह (गाजा पट्टी), कात्तिक १२ गते ।   गाजामा इजरायली हवाई आक्रमण हुँदा कम्तीमा ६० जना नागरिकको मृत्यु भएको छ । मारिनेहरूमा धेरै बालबालिका र महिलाहरू रहेका छन् । स्थानीय अस्पतालका अधिकारीहरूले यो घटनालाई यस महिनाको सुरुदेखि लागू भएको नाजुक युद्धविरामका लागि सबैभन्दा ठूलो चुनौती भनेका छन् ।

मध्य गाजाको देइर अल–बालाहस्थित अल–अक्सा अस्पतालमा आक्रमणपछि तीन महिला र छ बालबालिकासहित कम्तीमा १० जनाको शव ल्याइएको छ । दक्षिणी गाजाको खान युनुसस्थित नासेर अस्पतालमा पाँचवटा हवाई आक्रमणपछि २० वटा शव पुर्‍याइएको बताइएको छ, जसमा १३ बालबालिका र दुई महिला रहेका छन् ।
त्यस्तै, अल–अवदा अस्पतालमा ३० जना मृतक ल्याइएका छन्, तीमध्ये १४ जना बालबालिका रहेको पुष्टि भएको छ । अस्पतालहरूमा घाइतेहरूको चाप अत्यधिक भएको र औषधि तथा उपचार सामग्री अभावमा स्वास्थ्यकर्मीहरू कठिनाइमा परेको चिकित्सकहरूले बताएका छन् ।

इजरायली अधिकारीका अनुसार दक्षिणी गाजामा सेनामाथि गोली प्रहार भएको घटनापछि प्रधानमन्त्री बेन्जामिन नेतान्याहुले ‘शक्तिशाली आक्रमण’ गर्न निर्देशन दिएका थिए । उक्त आक्रमण सोमबार हमासले एउटा बन्धकको ‘आंशिक अवशेष’ हस्तान्तरण गरेपछि भएको जनाइएको छ । इजरायलले ती अवशेष युद्धको सुरुआती चरणमा अपहरणमा परेका आफ्ना नागरिकका भएको दाबी गरेको छ ।

घटनापछि हमासले अर्को बन्धकको शव हस्तान्तरणमा ढिलाइ गर्ने चेतावनी दिएको छ, जसले द्वन्द्वलाई अझ गहिरो बनाएको छ । यसैबीच, संयुक्त राज्य अमेरिकाले स्थिति नियन्त्रणमा ल्याउन कूटनीतिक पहल थालेको छ । अमेरिकी उपराष्ट्रपति जेडी भान्सले हिंसात्मक झडपहरू चाँडै अन्त्य हुने आशा व्यक्त गरेका छन् । तर विश्लेषकहरूका अनुसार गाजामा भइरहेको निरन्तर आक्रमण र तीव्र हताहतीका कारण युद्धविराम पुनः संकटमा परेको छ । स्थानीय अधिकारीहरूले दर्जनौँ परिवार भग्नावशेषभित्र बेपत्ता रहेको जनाउँदै आक्रमण नरोके मानवीय सङ्कट झनै भयावह बन्ने चेतावनी दिएका छन् ।

नयाँ दिल्ली  ४ कार्तिक।

बलिउडका चर्चित वरिष्ठ अभिनेता गोवर्धन असरानीको ८४ वर्षको उमेरमा निधन भएको छ। मुम्बईको जुहूस्थित आरोग्य निधि अस्पतालमा उपचाररत अवस्थामा सोमबार दिउँसो ३ देखि ३ः३० बजेको बीचमा उनको निधन भएको भारतीय सञ्चारमाध्यमहरूले जनाएका छन्।

असरानीका निजी सचिव बाबुभाईले पनि उनको निधनको पुष्टि गरेका छन्। स्वास्थ्य समस्याका कारण उनलाई पछिल्ला चार दिनदेखि अस्पतालमा भर्ना गरिएको थियो।

उनको अन्तिम संस्कार मुम्बईको सान्ताक्रुजस्थित शास्त्री नगर श्मशानघाटमा गरिएको हो। अन्तिम संस्कारमा उनका परिवारका सदस्य, आफन्त र बलिउडका नजिकका कलाकारहरूको उपस्थिति रहेको बताइएको छ।

गोवर्धन असरानीको जन्म सन् १९४१ मा जयपुरमा भएको थियो। करिब पाँच दशक लामो अभिनय यात्रामा उनले सयौं हिन्दी फिल्ममा काम गरेका थिए।

असरानीले ‘शोले’, ‘चलती का नाम गाडी’, ‘आँखें’, ‘चुपके चुपके’, ‘हम’, ‘लगान’ लगायतका दर्जनौं चर्चित फिल्ममा हास्य तथा चरित्र भूमिकामा उत्कृष्ट अभिनय गरेका थिए। उनका संवाद र हास्य अभिनयले उनलाई बलिउडको सर्वाधिक प्रिय हास्य कलाकारमध्ये एकको रूपमा स्थापित गराएको थियो।