इरानमा जारी प्रदर्शनमा पाँच सय बढीको मृत्यु, १० हजारभन्दा बढी पक्राउ

102

तेहरान, इरान २८ पुष — अमेरिकामा आधारित मानवअधिकार समूह एचआरएएनए (HRANA) का अनुसार इरानमा पछिल्ला दुई हप्तादेखि जारी प्रदर्शनका क्रममा कम्तीमा ४ सय ९० प्रदर्शनकारी र ४८ सुरक्षा कर्मचारी गरी कुल पाँच सयभन्दा बढीको मृत्यु भएको छ। यसै अवधिमा १० हजार ६ सयभन्दा बढी व्यक्तिहरू पक्राउ परेको समूहले जनाएको छ।
डिसेम्बर २८ देखि मूल्यवृद्धिविरुद्ध सुरु भएको प्रदर्शन क्रमशः इस्लामिक गणतन्त्रविरुद्धको व्यापक आन्दोलनमा रूपान्तरण भएको छ। सरकारले इन्टरनेट सेवामा प्रतिबन्ध लगाएपछि सूचनाको प्रवाहमा गम्भीर अवरोध आएको बताइएको छ।
यसबीच अमेरिकी राष्ट्रपति डोनाल्ड ट्रम्पले प्रदर्शनकारीमाथि बल प्रयोग भए अमेरिकाले हस्तक्षेप गर्न सक्ने चेतावनी बारम्बार दिएका छन्। उनले सामाजिक सञ्जालमा लेखेका छन्, “इरान स्वतन्त्रतालाई हेरिरहेको छ‘ अमेरिका मद्दत गर्न तयार छ|”
ट्रम्पको अभिव्यक्तिप्रति प्रतिक्रिया दिँदै इरानले अमेरिकालाई ‘गलत क्रियाकलाप ’ नगर्न चेतावनी दिएको छ। इरानी संसदका सभामुख मोहम्मद बाकर कालिबाफले भने, “हामी स्पष्ट छौँ—इरानमाथि आक्रमण भए कब्जा गरिएका क्षेत्रहरू (इजरायल) साथै सबै अमेरिकी अड्डा र जहाजहरू हाम्रो वैध निशाना हुनेछन्।”
इजरायली स्रोतहरूले अमेरिकी हस्तक्षेपको सम्भावनालाई ध्यानमा राख्दै उच्च सतर्कता अपनाइएको बताएका छन्।
सरकारी टेलिभिजनले मृत सुरक्षाकर्मीहरूलाई ‘सहीद’ घोषणा गर्दै तीन दिनको राष्ट्रिय शोक मनाएको छ। त्यस्तै, प्रदर्शनकारीहरूलाई ‘दंगालु र आतंककारी’ को संज्ञा दिँदै आएको छ।
संयुक्त राष्ट्रसंघका महासचिव एन्टोनियो गुटेरेसले जारी हिंसाप्रति स्तब्ध भएको बताउँदै सबै पक्षलाई अधिकतम संयम अपनाउन आग्रह गरेका छन्।
यो सन् २०२२ यताकै सबैभन्दा ठूलो प्रदर्शन भएको जनाइएको छ, जसले इरानका सर्वोच्च नेता अली खामेनीको शासनका लागि गम्भीर चुनौती खडा गरेको विश्लेषकहरूको भनाइ छ।
एजेन्सी