उत्सव खबर

१९ साउन, काठमाडौं :  कक्षा १२ को नतिजा आज (सोमबार) सार्वजिनक हुने भएको छ । नतिजा सार्वजनिक गर्नका लागि आजै साँझ ५ बजेका लागि परीक्षा बोर्डको बैठक बस्ने तयारी छ

१९ साउन, काठमाडौं – भिजिट भिसा प्रकरणमा संसदीय छानबिनको माग गर्दै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) का सांसदहरू आज पुनः संसद् बैठकमा आफ्ना धारणा राखेर बैठक बहिष्कार गर्दै बाहिरिएका छन्।

गत जेठ १३ गतेदेखि निरन्तर रुपमा संसद्मा विरोध जनाउँदै आएका सांसदहरूले भिजिट भिसाको नाममा भइरहेको मानव तस्करीको गम्भीर आरोप लगाउँदै संसदीय छानबिन समितिको गठन गर्न सरकारसँग माग गर्दै आएका छन्।

आजको बैठकमा रास्वपाका सांसद असिम साहले भिजिट भिसा प्रकरणमा उठेका प्रश्नहरू उठाउँदै भने, “भिजिट भिसाको नाममा भएको मानव तस्करको फाइल कहाँ पुग्यो ?” उनले थपे, “भ्रष्टाचारको अडियो सार्वजनिक भएको छ, घुस मागेको प्रमाणसमेत बाहिरिएको छ। एक जना मन्त्रीले राजीनामा दिएपछि त्यो घटनामा संलग्न अरूको जाँच नहुने हो ? राजीनामाले सबै पखालिन्छ त ?”

सांसद साहले पूर्व मन्त्रीहरूप्रति इङ्गित गर्दै अदृश्य शक्तिहरूको संरक्षण रहेको आरोप पनि लगाए। “तत्कालीन मन्त्री राजकुमार गुप्ताले राजीनामा दिनुभयो, त्यसपछि छानबिनको फाइल बन्द भयो। तर त्यही अडियोमा नाम आएका अन्य मन्त्रीहरूलाई किन संरक्षण दिइरहेको छ ?” भन्ने प्रश्न गर्दै सरकारको भूमिकामाथि गम्भीर शंका व्यक्त गरे।

यता, राप्रपाका सांसद ध्रुवबहादुर प्रधानले विषयलाई केवल भिजिट भिसासँग मात्र नजोड्न आग्रह गर्दै भने, “यो समस्या भिजिट भिसाको मात्र होइन, नियतको हो। इमिग्रेशन प्रणाली पनि जोडिएको छ।”

प्रधानले व्यवस्थाविरोधी र संविधान विरोधी भन्ने आरोप कार्यकारी प्रमुखबाट आउनु दुर्भाग्यपूर्ण भएको बताए। “जब ३० लाख जनताको प्रतिनिधित्व गर्ने सांसदहरूले आवाज उठाउँछन्, तब व्यवस्थाविरोधी भनिन्छ, जुन अत्यन्तै खेदजनक हो,” उनले भने।

उनले आफूहरू समस्या होइन, समाधान खोजिरहेको भन्दै संसदीय छानबिन समितिको मागलाई यथाशीघ्र सम्बोधन गर्न आग्रह गरे।

रास्वपा र राप्रपाका सांसदहरूले संसद् बैठक बहिष्कार गर्दै चेतावनीसमेत दिएका छन् कि छानबिन समिति गठन नभएसम्म दबाबमूलक कार्यक्रम जारी रहनेछ।

१८ श्रावन। नेपाली बजारमा आइतबार सुनको मूल्य बढेको छ ।
नेपाल सुनचाँदी व्यवसायी महासंघकाअनुसार आज छापावाल सुनको मूल्य तोलामा ३ हजार ४ सय रुपैयाँले बढेर १ लाख ९६ हजार ५ सयमा कारोबार भइरहेको छ ।
यसअघि गत शुक्रबार सुन तोलाको १ लाख ९३ हजार १ सय रुपैयाँमा कारोबार भएको थियो ।
यस्तै, आज चाँदीको मूल्य पनि बढेको छ । तोलामा १५ रुपैयाँले बढेर चाँदी २ हजार २ सय ५० रुपैयाँमा कारोबार भइरहेको महासंघले जनाएको छ ।