सिर्सिया नदिको प्रदूषित पानीको कारण १३ वर्षीय बालकको ज्यान गयो

120

बारा, १७ साउन

बाराको जितपुरसिमरा उपमहानगरपालिका–५ मा १३ वर्षीय बालक सन्दीप मुखियाको उद्योगबाट निस्किएको प्रदूषित पानीमा डुबेर मृत्यु भएपछि स्थानीय स्तरमा आक्रोश चुलिएको छ। शुक्रबार सिर्सिया कुलो (बर्खि बाँध) मा डुबेका बालकको शव विषाक्त पानीमा भेटिएपछि, शल्य परीक्षणले मृत्युको कारण प्रदूषित रसायनयुक्त पानी भएको पुष्टि गरेको छ।

शनिबार बिहानदेखि आक्रोशित परिवार र स्थानीय बासिन्दाले गणपति घ्यू, नन्दन घ्यू र आसपासका उद्योगहरूको अगाडि बालकको शव तेस्र्याएर प्रदर्शन गरेका छन्। मृतकका आमाले आँखा रसाउँदै भनिन्, “मेरो छोरा निर्दोष थियो, तर उद्योगको लापरवाहीले उसको ज्यान गयो।”

स्थानीयवासीका अनुसार, गणपति घ्यू, नन्दन घ्यू, अशोक स्टिल लगायतका उद्योगहरूले प्रशोधन नगरी विषाक्त पानी सिधै खोलामा छोड्दै आएका छन्। ती रसायनयुक्त पानी बग्ने कुलो आसपासको क्षेत्र लामो समयदेखि दुर्गन्धित र अस्वस्थ वातावरणमा परिणत भएको छ।

लापरवाहीले बालकको ज्यान गएको भन्दै स्थानीयले क्षतिपूर्तिसहित उद्योगलाई कारबाही गर्न माग गरेका छन्। इलाका प्रहरी कार्यालय सिमराका प्रहरी नायब उपरीक्षक (डीएसपी) वेदप्रकाश जोशीले घटनाबाट आक्रोशित परिवार र स्थानीयले उद्योग अगाडि प्रदर्शन गरिरहेको बताए। डीएसपी जोशीले पीडित पक्ष, जनप्रतिनिधि र उद्योग प्रशासनबीच छलफल भइरहेको जानकारी दिए।
दुखः को कुरा छ यहाँ, मृत बालकको शव तेस्र्याएर पीडित पक्ष उद्योग अगाडि बसिरहनुभएको छ’ डीएसपी जोशीले भने ‘हामीले सबै पक्षलाई एकै ठाउँमा राखेर छलफलको वातावरण बनाएका छौं। अहिले छलफल चलिरहेको छ।