उत्सव खबर 
Raju Sah
गृहमन्त्री लेखकद्वारा लागुऔषध नियन्त्रण ब्यूरोको अनुगमन, समाजलाई लागुऔषधमुक्त बनाउन निर्देशन
काठमाडौं, श्रावण १७ – गृहमन्त्री रमेश लेखकले आज लागुऔषध नियन्त्रण ब्यूरोको अनुगमन तथा निरीक्षण गर्नुका साथै समाजलाई लागुऔषधमुक्त बनाउनका लागि सशक्त निर्देशन दिनुभएको छ।
अनुगमनको क्रममा प्रहरी महानिरीक्षक (आईजीपी) दिपक थापा तथा केन्द्रीय अनुसन्धान ब्यूरो (सीआईबी) का प्रमुख अतिरिक्त महानिरीक्षक (एआईजी) चन्द्र कुबेर खापुङ पनि सहभागी रहेका थिए।
गृहमन्त्री लेखकले ब्यूरोअन्तर्गतका विभिन्न शाखाहरूको अवलोकन तथा समिक्षा गर्दै ब्यूरोले अहिलेसम्म पुर्याएको कार्यप्रति प्रशंसा व्यक्त गर्नुभयो। उहाँले ब्यूरोमा कार्यरत सम्पूर्ण प्रहरी कर्मचारीलाई समर्पणसाथ लागुऔषध नियन्त्रणमा खेलेको भूमिकाको उच्च मूल्याङ्कन गर्दै धन्यवाद ज्ञापन गर्नुभयो।
उहाँले भनुभयो, “लागुऔषधको प्रभावले समाजमा गम्भीर असर पारिरहेको अवस्थामा, सीमित स्रोतसाधनको अधिकतम उपयोग गर्दै लागुऔषधको जालो तोड्न आवश्यक छ। यो अभियानमा सबै निकाय थप प्रभावकारी रूपमा लाग्नुपर्छ।”
गृहमन्त्री लेखकको निर्देशनले लागुऔषध विरुद्धको अभियानलाई थप सुदृढ बनाउने विश्वास ब्यक्त गरिएको छ।