वीरगन्ज, १० पुस- बढ्दो चिसो र शितलहरका कारण गरिब तथा अशक्त नागरिकको दैनिकी कष्टकर बन्दै गएको अवस्थालाई मध्यनजर गर्दै वीरगन्ज उद्योग वाणिज्य संघको पहलमा स्थानीय प्रशासनलाई ३ सय ७५ थान कम्बल हस्तान्तरण गरिएको छ ।
विभिन्न संघ–संस्था तथा उद्योगको सहकार्यमा संकलन गरिएको कम्बल बिहीबार वीरगन्ज उद्योग वाणिज्य संघका अध्यक्ष हरि गौतमले जिल्ला प्रशासन कार्यालय, पर्सामा पुगेर प्रमुख जिल्ला अधिकारी भोला दाहाललाई हस्तान्तरण गरेका हुन् । ती कम्बलहरू जिल्ला प्रशासनमार्फत आवश्यक परेका विपन्न तथा असक्त नागरिकलाई वितरण गरिने जनाइएको छ ।
अध्यक्ष गौतमका अनुसार विभिन्न संघ संस्थाको सहयोगमा ३ सय ७५ थान कम्बल संकलन गरिएको हो । निजी क्षेत्रको सामाजिक उत्तरदायित्वअन्तर्गत चिसोबाट प्रभावित समुदायलाई राहत पुर्याउने उद्देश्यले यो पहल गरिएको उनले बताए ।
