उत्सव खबर

बारा, १४ माघ – बाराको परवानीपुर गाउँपालिका–१ मा आमा–छोराको हत्या घटनामा मृतक रामेश्वर मण्डलकी श्रीमतीको योजनामा हत्या भएको आशंका प्रहरीले गरेको छ। प्रारम्भिक अनुसन्धानका आधारमा २३ वर्षीया मानिता देवीको योजनामा सासू सुमित्रादेवी मण्डल र श्रीमान् रामेश्वर मण्डलको हत्या भएको निष्कर्षमा प्रहरी पुगेको हो।

घटनासँग सम्बन्धित आरोपमा मानितासहित एक युवकलाई प्रहरीले पक्राउ गरेको छ। पक्राउ परेका युवक मानिताका पूर्वप्रेमी रहेको खुलेको छ। प्रहरीका अनुसार ती युवक वैदेशिक रोजगारीका लागि दुबईमा रहेका थिए र माघ १२ गते दुबईबाट काठमाडौं हुँदै बारा आएका थिए। हत्या योजनासहित नेपाल आएको आशंकामा अनुसन्धान भइरहेको प्रहरीले जनाएको छ।

प्रहरीले ‘सुपारी’ दिएर अन्य व्यक्तिमार्फत हत्या गराइएको हो वा ती युवक स्वयं संलग्न छन् भन्ने विषयमा थप अनुसन्धान गरिरहेको छ। गएराति घरभित्रै आक्रमण हुँदा ४६ वर्षीया सुमित्रादेवी मण्डल र उनका २८ वर्षीय छोरा रामेश्वर मण्डलको मृत्यु भएको थियो।

घटनामा मृतक रामेश्वरका बुबा ५० वर्षीय जगरुप मण्डल र २० वर्षीया बहिनी रिणा कुमारी मण्डल घाइते भएका छन्। उनीहरूको वीरगन्जस्थित एलएस न्युरो अस्पतालमा उपचार भइरहेको छ।

वीरगञ्ज, पर्सा १४ माघ — वीरगञ्ज महानगरपालिका–स्थित मितेरी पुल क्षेत्रमा नवनिर्माण गरिएको सीमा सुरक्षा पोष्टको आज एक विशेष समारोहका बीच भव्य रूपमा उद्घाटन गरिएको छ।

“मितेरी पुल सीमा सौन्दर्यकरण कार्यक्रम” अन्तर्गत वीरगञ्ज महानगरपालिकाको आर्थिक सहयोग तथा ग्रिन सिटी सामुदायिक सेवा केन्द्र र सशस्त्र प्रहरी बल नेपाल नं. १३ गणको सहकार्यमा निर्माण सम्पन्न भएको उक्त सीमा सुरक्षा पोष्टको उद्घाटन वीरगञ्ज महानगरपालिकाका प्रमुख राजेशमान सिंहले गर्नुभयो।

उद्घाटन समारोहमा प्रमुख जिल्ला अधिकारी भोला प्रसाद दाहाल, सशस्त्र प्रहरी उपरीक्षक पुरण चन्द भट्ट, जिल्ला प्रहरी कार्यालय पर्साका प्रमुख प्रहरी उपरीक्षक (एसपी) सुदिप राज पाठक, जिल्ला ट्राफिक प्रहरी प्रमुख युवराज कटवाललगायत सुरक्षा निकायका उच्च पदस्थ अधिकारीहरूको उल्लेखनीय उपस्थिति रहेको थियो।

कार्यक्रममा सहभागी वक्ताहरूले सीमा क्षेत्रमा सुरक्षा व्यवस्थालाई थप प्रभावकारी बनाउने, आवागमनलाई व्यवस्थित गर्ने तथा मितेरी पुल क्षेत्रको समग्र सौन्दर्य अभिवृद्धिमा नवनिर्मित सीमा सुरक्षा पोष्टले महत्वपूर्ण योगदान पुर्‍याउने विश्वास व्यक्त गरेका थिए।

पर्सा, १३ माघ । जिल्ला प्रहरी कार्यालय पर्साले ५५ के.जी. लागुऔषध गाँजा जस्तो देखिने पदार्थसहित एक जनालाई पक्राउ गरेको छ।

माघ १० गते साँझ करिब ८ः३० बजे पर्सा जिल्लाको ठोरी गाउँपालिका–४, विशाल चोकस्थित बस्ने वर्ष ३४ का सुरेश श्रेष्ठको घरमा लागुऔषधको कारोबार भइरहेको भन्ने विशेष सूचनाको आधारमा प्रहरीले छापा मारेको हो।

जिल्ला प्रहरी कार्यालय पर्सा तथा इलाका प्रहरी कार्यालय ठोरीबाट खटिएको प्रहरी टोलीले घर खानतलासी गर्दा लुकाइछिपाइ राखिएको अवस्थामा प्लास्टिकले बेरिएको ५ प्याकेटमा जम्मा ५५ के.जी. लागुऔषध गाँजा जस्तो देखिने पदार्थ बरामद गरेको प्रहरीले जनाएको छ।

बरामद गरिएको लागुऔषधसहित सुरेश श्रेष्ठलाई नियन्त्रणमा लिई लागुऔषध सम्बन्धी कसुरमा जिल्ला अदालत पर्साबाट १० दिनको म्याद थप अनुमति लिएर थप अनुसन्धान भइरहेको जिल्ला प्रहरी कार्यालय पर्साले जानकारी दिएको छ।