उत्सव खबर 
Raju Sah
काठमाडौं, २५ माघ- गृहमन्त्री ओमप्रकाश अर्यालको प्रमुख आतिथ्यतामा “नेपाल प्रहरी रणनीतिक सम्मेलन–२०८२” आइतबार नेपाल प्रहरी प्रधान कार्यालय, नक्सालमा शुभारम्भ भएको छ । प्रहरी व्यवस्थापन र परिचालन विद्यमान चुनौतीहरू र भावी कार्यदिशा विषयमा केन्द्रित उक्त सम्मेलन दुई दिनसम्म सञ्चालन हुनेछ ।
सम्मेलनको उद्घाटन गर्दै गृहमन्त्री अर्यालले सामाजिक सञ्जाल र साइबर अपराध, प्रहरी पोशाक परिमार्जन तथा ट्राफिक प्रहरीको कार्यबोझ सम्बन्धी तीन अध्ययन प्रतिवेदन सार्वजनिक गर्नुभयो । उहाँले नागरिक समाज र विज्ञहरूसँगको अन्तरक्रियाले प्रहरी सेवाको रणनीतिक रूपान्तरणमा महत्वपूर्ण योगदान पुग्ने विश्वास व्यक्त गर्दै सम्मेलनका निष्कर्ष कार्यान्वयनमा सरकारको नीतिगत समर्थन रहने प्रतिबद्धता जनाउनुभयो ।
कार्यक्रममा गृहसचिव राजकुमार श्रेष्ठले बदलिँदो अपराध प्रवृत्तिलाई सम्बोधन गर्न सम्मेलन उपयोगी हुने बताउनुभयो । प्रहरी महानिरीक्षक दान बहादुर कार्कीले जनउत्तरदायी, व्यावसायिक र प्रविधिमैत्री प्रहरी सेवा सुदृढ बनाउने प्रतिबद्धता व्यक्त गर्नुभयो ।
दुई दिवसीय सम्मेलनमा सुरक्षा चुनौती, अपराध प्रवृत्ति, प्रहरी–नागरिक सम्बन्ध, सूचना प्रविधि, विपद् व्यवस्थापन तथा सडक सुरक्षा लगायत विषयमा छलफल हुनेछ ।
