उत्सव खबर 
Raju Sah
काठमाडौं, २५ माघ — फागुन २१ गते हुने प्रतिनिधि सभा निर्वाचनका लागि छापिएका मतपत्र यही माघ महिनाको अन्त्यबाट सम्बन्धित जिल्लामा पठाइने भएको छ । निर्वाचन आयोगले मतपत्र ढुवानीको तयारी तीव्र पारेको जनाएको छ ।
शनिबार आयोगमा बसेको मतपत्र ढुवानी समितिको बैठकले छापेर तयारी अवस्थामा राखिएका मतपत्र जिल्लामा पठाउन सुरु गर्ने निर्णय गरेको हो । आयोगका प्रवक्ता नारायणप्रसाद भट्टराईका अनुसार फागुनको पहिलो साताभित्र सबै मतपत्र सम्बन्धित जिल्लामा पुर्याइसक्ने लक्ष्य राखिएको छ ।
मतपत्र नेपाली सेनाको सुरक्षामा सम्बन्धित जिल्लामा पठाइने आयोगले जनाएको छ । सेनाले मतपत्र जिल्लामा पुर्याएर जिल्ला सुरक्षा समितिलाई जिम्मा लगाउनेछ भने आवश्यकताअनुसार त्यसको सुरक्षा पनि सेनाले नै गर्नेछ ।
“मतपत्र पुर्याइएका जिल्लामा कुन कार्यालयमा राख्ने भन्ने विषयमा अहिले छलफल भइरहेको छ,” प्रवक्ता भट्टराईले जानकारी दिनुभयो ।
निर्वाचन आयोगले समानुपातिक र प्रत्यक्षतर्फका मतपत्र एकैपटक ढुवानी गर्ने तयारी गरेको छ । हाल जनक शिक्षा सामग्री केन्द्रले मतपत्र छाप्ने काम गरिरहेको छ । समानुपातिकतर्फका मतपत्र छपाइ कार्य यसअघि नै सम्पन्न भइसकेको छ भने प्रत्यक्षतर्फका मतपत्रको छपाइ कार्य जारी रहेको आयोगले जनाएको छ ।