उत्सव खबर 
Raju Sah
काठमाडौं, २ माघ — प्रतिनिधिसभा निर्वाचनको सञ्चालन तथा व्यवस्थापन प्रयोजनका लागि निर्वाचन आयोगले आजदेखि देशभरका सबै निर्वाचन क्षेत्रमा निर्वाचन अधिकृतको कार्यालय स्थापना गर्ने भएको छ।
प्रत्यक्ष निर्वाचन प्रणालीतर्फको उम्मेदवारी मनोनयन ६ माघमा हुने भएपछि त्यसको पूर्वतयारीस्वरूप सम्बन्धित निर्वाचन क्षेत्रहरूमा निर्वाचन कार्यालय खोली कर्मचारी खटाउने तयारी गरिएको आयोगले जनाएको छ।
आयोगका सहायक प्रवक्ता सीता श्रीस पुनका अनुसार आजदेखि १ सय ६५ वटै निर्वाचन क्षेत्रमा निर्वाचन अधिकृतको कार्यालय सञ्चालनमा आउनेछ। निर्वाचन प्रक्रिया प्रभावकारी र व्यवस्थित रूपमा अघि बढाउन आयोगले आवश्यक जनशक्ति परिचालन गरिसकेको छ।
आयोगले प्रत्येक जिल्लाका लागि ७७ जना मुख्य निर्वाचन अधिकृत तथा ८८ जना निर्वाचन अधिकृत तोकिसकेको छ। मुख्य निर्वाचन अधिकृत र निर्वाचन अधिकृतलाई एक–एक निर्वाचन क्षेत्रको जिम्मेवारी प्रदान गरिएको छ।
मुख्य निर्वाचन अधिकृतको रूपमा जिल्ला न्यायाधीशहरूलाई तोकिएको छ भने न्याय सेवाका द्वितीय श्रेणीका अधिकृतहरूलाई निर्वाचन अधिकृत नियुक्त गरिएको छ। न्याय परिषद्सँगको परामर्शमा आयोगले मुख्य तथा अन्य निर्वाचन अधिकृतहरूको नाम टुंगो लगाएको जनाएको छ।