उत्सव खबर 
Raju Sah
चितवन, २७ पुस – डेढ वर्षअघि चितवनको सिमलतालस्थित त्रिशुली नदीमा खसेर बेपत्ता भएका दुई पटा बसमध्ये एकको केही अवशेष फेला परेको छ। आज फेला परेको अवशेष काठमाडौंबाट गौरतर्फ आउँदै गरेको गणपति डिलक्स बसको हुन सक्ने आशंका गरिएको छ।
२०८१ साल असार २८ गते वीरगन्जबाट काठमाडौंतर्फ जाँदै गरेको एन्जल डिलक्स र काठमाडौंबाट गौरतर्फ आउँदै गरेको गणपति डिलक्स बस एकै दिन सिमलताल क्षेत्रमा दुर्घटनामा परेर त्रिशुली नदीमा खसेका थिए। उक्त दुर्घटनामा बसमा सवार बाराका ६२ जना यात्रु बेपत्ता भएका थिए भने ३ जना यात्रुले पौडिएर ज्यान जोगाएका थिए।
दुर्घटनापछि सुरक्षाकर्मी, स्थानीय तथा विभिन्न निकायको सहयोगमा लामो समयसम्म खोजी कार्य सञ्चालन गरिएको थियो। धेरै दिनको प्रयासपछि २४ जनाको शव मात्र फेला परेको थियो भने बाँकी यात्रुहरूको अवस्था अहिलेसम्म अज्ञात नै रहँदै आएको छ।
आज नदी किनार तथा आसपासको क्षेत्रमा खोजीका क्रममा फेला परेको अवशेष बसको संरचनासँग मिल्दोजुल्दो देखिएकाले गणपति डिलक्स बसकै हुन सक्ने अनुमान गरिएको सम्बन्धित निकायले जनाएको छ। अवशेषको यकिन पहिचानका लागि थप प्राविधिक परीक्षण तथा अध्ययन गरिने बताइएको छ।