गुठी संस्थान र गाउँपालिकाको संयुक्त कारबाही, महुवन मठको अतिक्रमण हटाइँदै

139

पर्सा, १५ पुस- पर्सा जिल्लाको सखुवा प्रसौनी गाउँपालिका–५ मा अवस्थित धार्मिक तथा ऐतिहासिक महत्व बोकेको श्री पारसनाथ महादेव मन्दिर (महुवन मठ) को लामो समयदेखि अतिक्रमित जग्गा खाली गराउन सरकारी निकायहरू सक्रिय भएका छन् ।

गुठी संस्थान र सखुवा प्रसौनी गाउँपालिकाले संयुक्त रूपमा अतिक्रमणकारीहरूलाई ७ दिनभित्र अनधिकृत संरचना हटाउन अन्तिम अल्टिमेटम दिएका छन् । गुठी संस्थान शाखा कार्यालय वीरगञ्जकी प्रमुख उर्मिला आचार्यले पत्र जारी गर्दै महुवन मठको नाममा दर्ता रहेको कित्ता नम्बर २७६ को ५ बिघा १७ कट्ठा १४ धुर जग्गा मा निर्माण गरिएका घर–टहरा तोकिएको समयसीमाभित्र हटाउन निर्देशन दिएको छ । सोही पत्रका आधारमा सखुवा प्रसौनी गाउँपालिकाका अध्यक्ष जसवन्त यादवले पनि सार्वजनिक सूचना जारी गर्दै अतिक्रमण तत्काल हटाई धार्मिक सम्पत्तिको संरक्षणमा सहयोग गर्न आग्रह गरेका छन् । उनले अटेर गरेमा कानुनअनुसार बल प्रयोग गरी संरचना हटाइने र त्यसको सम्पूर्ण खर्च अतिक्रमणकारीबाटै असुल गरिने चेतावनी दिएका छन् ।

महुवन मठको जग्गा लामो समयदेखि विवादित रहँदै आएको थियो । राजनीतिक हस्तक्षेप र दबाबका कारण समस्या समाधान हुन नसकेको स्थानीयहरूको गुनासो थियो । स्थानीय बासिन्दा उप्रान्त यादवका अनुसार राजनीतिक दाउपेच र पूर्वाग्रहकै कारण जग्गा खाली हुन सकेको थिएन । “अहिले दुवै निकायका प्रमुखहरूले हस्ताक्षर गरेर पत्र जारी गरेपछि मठको सम्पत्ति जोगिने आशा जागेको छ,” उनले भने । स्थानीयवासीहरूले यसपटक राजनीतिक प्रभावबिना निष्पक्ष कारबाही हुने विश्वास व्यक्त गरेका छन् । ७ दिनभित्र स्वतः संरचना नहटाएमा सुरक्षा निकायको सहयोगमा डोजर प्रयोग गरी अतिक्रमण हटाउने तयारी गाउँपालिकाले गरेको जनाइएको छ ।
घटनाले धार्मिक तथा ऐतिहासिक सम्पदाको संरक्षणमा नयाँ आशा जगाएको छ भने वर्षौंदेखि अल्झिएको जग्गा विवाद अब छिट्टै टुंगिने संकेत देखिएको छ ।