उत्सव खबर 
Raju Sah
120
काठमाडौं, १५ पुस। थाइल्याण्डबाट नेपाल ल्याइएको ठूलो परिमाणको लागु औषध गाँजासहित त्रिभुवन अन्तर्राष्ट्रिय विमानस्थलबाट एक भारतीय नागरिक पक्राउ परेका छन्। पक्राउ पर्नेमा नियाज नाम गरेका ३१ वर्षीय भारतीय नागरिक रहेका छन्। उनलाई विमानस्थल सुरक्षा प्रहरी कार्यालय र भन्सार कार्यालयको संयुक्त टोलीले सोमबार राति पक्राउ गरेको हो।
प्रहरीका अनुसार नेपाल एयरलाइन्सको उडानमार्फत बैंककबाट काठमाडौं आएका नियाजको लगेज जाँचका क्रममा १२ किलो ७ सय ५० ग्राम गाँजा फेला परेको थियो। शंकास्पद गतिविधि देखिएपछि गरिएको विस्तृत जाँचमा उक्त लागूऔषध बरामद भएको प्रहरीले जनाएको छ।
पक्राउ परेका नियाजलाई आवश्यक अनुसन्धान तथा कानुनी कारबाहीका लागि लागूऔषध नियन्त्रण ब्यूरो पठाइएको छ। घटनाबारे थप अनुसन्धान भइरहेको प्रहरीले जानकारी दिएको छ