उत्सव खबर 
Raju Sah
काठमाडौँ, १२ कार्तिक : — नेकपा (एमाले) का पूर्वसांसद तथा प्रभु ग्रुपका अध्यक्ष देवीप्रसाद भट्टचन ९८ करोड रुपैयाँ ठगी गरेको आरोपमा पक्राउ परेका छन्। प्रहरी अपराध अनुसन्धान महाशाखा (सीआईबी) ले उनलाई ललितपुरबाट पक्राउ गरेको हो। भट्टचनविरुद्ध प्रभु म्यानेजमेन्टकी अध्यक्ष कुसुम लामाले ठगीसम्बन्धी उजुरी दिएकी थिइन्। लामाले आफ्नो संस्थासँग सम्बन्धित रकम हिनामिना गरी ठगी गरेको आरोप लगाउँदै प्रहरीमा जाहेरी दर्ता गरेकी थिइन्।
सीआईबीका अनुसार प्रारम्भिक अनुसन्धानमा प्रभु ग्रुपसँग सम्बन्धित विभिन्न व्यवसायिक कारोबारमार्फत ठूलो परिमाणमा आर्थिक अनियमितता भएको देखिएको छ। उक्त प्रकरणमा थप अनुसन्धान जारी रहेको प्रहरीले जनाएको छ। यसअघि पनि भट्टचन सहकारी ठगी प्रकरणमा मुछिएका थिए। उनले विभिन्न सहकारीहरूमा लगानीका नाममा सर्वसाधारणको रकम दुरुपयोग गरेको आरोपमा प्रहरीमा उजुरी परेका थिए।
भट्टचन एमाले अध्यक्ष तथा पूर्वप्रधानमन्त्री केपी शर्मा ओली निकट व्यक्ति मानिन्छन्। पार्टीभित्र उनी आर्थिक रूपमा प्रभावशाली र शक्तिशाली नेताका रूपमा चिनिँदै आएका थिए। प्रहरीले अहिले उनलाई विस्तृत बयानका लागि नियन्त्रणमा राखेको र घटनाको सम्पूर्ण विवरण अनुसन्धानपछि मात्रै सार्वजनिक हुने जनाएको छ।