उत्सव खबर 
Raju Sah
५ कात्तिक, चन्द्रपुर (रौतहट) ।
आज बिहान पूर्व–पश्चिम राजमार्गअन्तर्गत चन्द्रपुर–४, लच्का नजिकै काठमाडौँबाट चन्द्रनिगापुरतर्फ आउँदै गरेको यात्रुबाहक बसमा आगलागी भएको छ। प्र.२–०३–००१ ख ५५५५ नम्बरको उक्त बसमा अचानक आगो लाग्दा बस पूर्णरूपमा जलेर नष्ट भएको जिल्ला ट्राफिक प्रहरी कार्यालय रौतहटले जनाएको छ।
प्रहरीका अनुसार बसमा आगो लागेको जानकारी पाएलगत्तै सुरक्षाकर्मी र स्थानीयवासीको सहयोगमा आगो नियन्त्रणमा लिइएको थियो। आगलागीको कारण भने हालसम्म खुल्न सकेको छैन।
सौभाग्यवश, घटनामा कुनै मानवीय क्षति नभएको प्रहरीले पुष्टि गरेको छ। आगो लाग्नेबित्तिकै चालक र सह–चालकले यात्रुलाई सुरक्षित रूपमा बाहिर निकाल्न सफल भएका थिए।
प्रहरीले आगलागीको कारण पत्ता लगाउन थप अनुसन्धान भइरहेको जनाएको छ। प्रारम्भिक अनुमान अनुसार सर्ट सर्किटका कारण आगो लागेको हुनसक्ने आशंका गरिएको छ।
घटनापछि केही समयका लागि पूर्व–पश्चिम राजमार्गको सो खण्डमा सवारी आवागमन प्रभावित भए पनि अहिले यातायात नियमित अवस्थामा फर्किएको प्रहरीले जनाएको छ।