उत्सव खबर 
Raju Sah
५ कात्तिक, वीरगंज ।
मधेसका विभिन्न जिल्लामा आज गोवर्धन पूजा तथा गोधन कुट्ने पर्व श्रद्धा, भक्ति र उल्लासका साथ मनाइएको छ। विशेषगरी धनुषा, महोत्तरी, पर्सा, सिरहा, सर्लाही र सप्तरी लगायत मिथिला क्षेत्रका जिल्लाहरूमा महिलाहरूको सामूहिक सहभागितासहित टोल–टोलमा धार्मिक र सांस्कृतिक परम्परा अनुसार गोधन कुट्ने पर्व मनाइन्छ ।
हिन्दू परम्परा अनुसार गोवर्धन पूजा कार्तिक महिनाको पाँचौँ दिन मनाइन्छ। यस दिन महिलाहरू बिहानै नुहाएर घर–घर र टोल–टोलमा भेला भई गोबर, माटो र केराउको दानाबाट गोवर्धन पर्वत र गोधनको प्रतीकात्मक स्वरूप तयार गरी पूजा गर्ने गर्छन्।
पर्वको अवसरमा महिलाहरूले सामूहिक रूपमा गीत गाउने, नाच्ने र मिठा परिकार बनाएर वितरण गर्ने परम्परा रहेको छ। परम्परागत संस्कृतिको झ झल्को दिने यो पर्वले सामाजिक एकता, सहकार्य र श्रद्धाको सन्देश फैलाउने गर्दछ। यस दिन दिदीबहिनीले बजरी (गोधनबाट निकालिएको केराउका दाना) खुवाएपछि दाजुभाइले दिदीबहिनीलाई कोसेली दिने चलन रहेको छ ।
पर्साका वीरगंज, सर्लाहीको मलंगवा, धनुषाको जनकपुर लगायतका शहरमा बिहानैदेखि महिलाहरूको उत्साहपूर्ण सहभागिता देखिएको छ। स्थानीय समुदायका अगुवाहरूले यस पर्वलाई संस्कृतिको संरक्षण र भावी पुस्तामा परम्पराको हस्तान्तरणको अवसरका रूपमा लिएका छन्।
धार्मिक विश्वास अनुसार गोवर्धन पूजा भगवान् श्रीकृष्णले इन्द्रको अहंकार तोड्न गोवर्धन पर्वत उठाएको स्मरणमा मनाइन्छ। त्यस्तै, गोधन कुट्ने परम्पराले खेतीपाती र पशुधनको समृद्धिको कामना प्रकट गर्छ।