उत्सव खबर 
Raju Sah
काठमाडौं, २ कार्तिक — नेकपा (एमाले)का अध्यक्ष तथा पूर्वप्रधानमन्त्री केपी शर्मा ओलीले आफू कुनै पनि आयोग वा निकायले बोलाउँदा सहजै बयान दिन नजाने बताएका छन् । आइतबार सञ्चारकर्मीहरूसँग कुराकानी गर्दै उनले आफूले कुनै पनि आयोगको दबाबमा परेर बयान दिने काम नगर्ने स्पष्ट पारेका हुन् ।
ओलीले भने, “केपी ओली सोझो छ भन्दैमा, आयोगहरू जसले जहाँ जहाँ बनाउँदै हिँड्छन्, जसले सोध्दै हिँड्छन्, त्यहाँ त्यहाँ लुरुलुरु गएर बयान दिने काम हो ? त्यस्ता काम केपी ओलीले गर्दैन ।”
उनले थपे, “म कुनै पनि बयानमा आफैंलाई धोका दिने काम गर्दिनँ ।”
हालका दिनमा विभिन्न आयोग र अनुसन्धान निकायहरूले नेताहरूलाई बयानका लागि बोलाउँदै आएका बेला ओलीको यो अभिव्यक्ति आएको हो । उनले आफ्नो कार्यशैली र राजनीतिक निर्णयप्रति आफू विश्वस्त रहेको बताउँदै अनावश्यक आरोप र भ्रम सृजना गर्न खोज्नेहरूप्रति असन्तुष्टि पनि व्यक्त गरे ।
ओलीले सञ्चारकर्मीहरूसँगको कुराकानीमा पार्टीको वर्तमान अवस्था, आगामी राजनीतिक रणनीति र सरकारका गतिविधिबारे पनि आफ्नो धारणा राखेका थिए ।