उत्सव खबर 
Raju Sah
वीरगंज, १५ असोज । आश्विन शुक्ल नवमीका दिन आज देशभरका दशैँघर तथा पूजा स्थलहरूमा नौ दुर्गामध्येकी नवौँ देवी सिद्धिदात्रीको विधिपूर्वक पूजा आराधना गरिँदै छ। प्रत्येक वर्ष नवरात्रको अन्तिम दिनमा सिद्धिदात्री देवीको स्मरण र आराधना गर्ने वैदिक सनातनी परम्परा अनुसार आज भक्तजनहरूले श्रद्धा र भक्तिभावका साथ पूजा गरेका छन्।
धार्मिक विश्वास अनुसार सिद्धिदात्री देवीले भक्तलाई सिद्धि र सिद्धान्त प्रदान गर्ने भएकाले उहाँको पूजा गर्नाले आस्था, शक्ति र ज्ञान प्राप्त हुने मान्यता छ। दशैँ पर्वमा नवदुर्गाको नौ दिनसम्म विधिपूर्वक पूजा गर्ने प्रचलन रहिआएको छ, जसअनुसार आजको दिनले नवरात्रको औपचारिक समापनको दिनलाई समेत जनाउँछ।
देशका विभिन्न मन्दिर र शक्तिपीठहरूमा भक्तजनहरु बिहानैदेखि पूजाआजा, भजनकीर्तन र विशेष पूजापाट गरिरहेका छन्। भक्तजनहरूले घरघरमा दसैंघर तथा देवालयमा दुर्गा सप्तशतीको पाठ, आरती र बलि समेत गरेका छन्।
धार्मिक पण्डितहरूको भनाइ अनुसार, आश्विन शुक्ल नवमीका दिन गरिएको सिद्धिदात्री देवीको पूजा आराधनाले सम्पूर्ण नौ दुर्गाको दर्शन, आशीर्वाद र ऊर्जा प्राप्त हुने विश्वास गरिएको छ।