उत्सव खबर 
Raju Sah
वीरगंज, १२ असोज : नेपालकै प्रसिद्ध शक्ति पीठ वीरगंजको गहवा माई मन्दिरमा यस वर्ष पनि फूलपाती विशेष समारोह भव्य रूपमा सम्पन्न गर्न सम्पूर्ण तयारी पूरा भएको छ ।
मालपोत कार्यालयस्थित निशान भगवती मन्दिरबाट डोला, बाजागाजासहित फूलपाती गहवा माईमा भित्र्याइने छ । यो मात्र परम्परा नभई वीरगंजको गौरव, सांस्कृतिक धरोहर र आस्थाको साझा उत्सवका रूपमा लिइने गरिन्छ। भोलि सोमवार फूलपातीको शुभ दिन रहेको छ |
यस वर्षको फूलपाती कार्यक्रमको मूल आयोजक वीरगंज महानगरपालिका रहेको छ। साथै, श्री गहवामाई तिर्थ क्षेत्र विकास समिति, गहवा युवा क्लब, न्यू टाइगर क्लब, माईस्थान युवा क्लब र वीरगंज स्प्रिट क्लबले सहआयोजनामा जिम्मेवारी सम्हालेका छन्।
आयोजक समितिका अनुसार, सबैको हातेमालो र सहभागितामार्फत यस वर्षको फूलपातीलाई अझ भव्य र ऐतिहासिक बनाउन विशेष तयारी गरिएको छ। समारोहमा बाजागाजा, सांस्कृतिक कार्यक्रम र भक्तजनको ठूलो उपस्थिति रहने अपेक्षा गरिएको छ।