उत्सव खबर 
काठमाडौं, १७ बैशाख — नेपाल प्रहरीले पछिल्लो एक महिनाको अवधिमा देशभरबाट ४ सय १७ जना बिचौलियालाई पक्राउ गरेको जनाएको छ। प्रहरी प्रधान कार्यालयले सार्वजनिक गरेको बिहीबारको बुलेटिनअनुसार विभिन्न प्रदेश तथा जिल्लाबाट उनीहरूलाई नियन्त्रणमा लिइएको हो।
प्रहरीका अनुसार पक्राउ पर्नेहरूमध्ये काठमाडौं उपत्यकाबाट सबैभन्दा बढी १ सय २३ जना रहेका छन्। त्यसैगरी कोशी प्रदेशबाट ४५ जना, मधेश प्रदेशबाट ५० जना, बागमती प्रदेशका उपत्यकाबाहेकका जिल्लाबाट ७६ जना, गण्डकी प्रदेशबाट २७ जना, लुम्बिनी प्रदेशबाट ४४ जना, कर्णाली प्रदेशबाट २४ जना र सुदूरपश्चिम प्रदेशबाट २८ जना पक्राउ परेका छन्।
पक्राउ परेकामध्ये १ सय २१ जनाविरुद्ध मुद्दा दर्ता गरिएको प्रहरीले जनाएको छ। बाँकी २ सय ९६ जनालाई आवश्यक अनुसन्धानपछि छाडिएको बताइएको छ।
प्रहरीले अवैध गतिविधिमा संलग्न बिचौलियामाथि कारबाहीलाई निरन्तरता दिने र यस्ता कार्य नियन्त्रणका लागि निगरानी थप कडा बनाइने जनाएको छ।