उत्सव खबर 
काठमाडौं, माघ २९ — प्रधान सेनापति महारथी अशोक राज सिग्देलबाट आसन्न निर्वाचनलाई सुरक्षित, शान्तिपूर्ण र व्यवस्थित रूपमा सम्पन्न गर्न निर्देशन दिँदै जङ्गी अड्डामा पृतनापति समन्वयात्मक बैठक सम्पन्न भएको छ।
एकीकृत सुरक्षा योजना–२०८२ अनुसार आयोजित उक्त बैठकमा अन्य सुरक्षा निकाय तथा सम्बन्धित सबै सरोकारवालासँग प्रभावकारी समन्वय र सहकार्य गर्दै निर्वाचन सुरक्षालाई उच्च प्राथमिकतामा राखी कार्य गर्न निर्देशन दिइएको थियो।
बैठकमा निर्वाचन अवधिभर सुरक्षा व्यवस्थालाई चुस्त, दुरुस्त र परिणाममुखी बनाउने विषयमा छलफल भएको जनाइएको छ। साथै, सम्भावित सुरक्षा चुनौतीहरूको पूर्वआकलन गर्दै आवश्यक तयारी अवस्थामा रहन सम्बन्धित निकायहरूलाई निर्देशन दिइएको बताइएको छ।
नेपाली सेनाले निर्वाचनलाई स्वच्छ, निष्पक्ष र भयरहित वातावरणमा सम्पन्न गराउन आफ्नो भूमिकालाई जिम्मेवार र प्रतिबद्धतापूर्वक निर्वाह गर्ने जनाएको छ।