उत्सव खबर 
Raju Sah
काठमाडौँ, ११ माघ — सर्वोच्च अदालतले राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेको मुद्दा फिर्ता लिने निर्णयविरुद्ध परेको रिटमा थप सक्कल प्रमाण कागजात झिकाउन आदेश दिएको छ।
न्यायाधीशद्वय मनोजकुमार शर्मा र श्रीकान्त पौडेलको संयुक्त इजलासले आइतबार रिटमाथि प्रारम्भिक सुनुवाइ गर्दै सम्बन्धित कागजात मगाउन आदेश दिएको हो। अदालतले आवश्यक कागजात प्राप्त भएपछि अन्तरिम आदेशका लागि पेश गर्न समेत निर्देशन दिएको छ।
महान्यायाधिवक्ता सविता भण्डारीले लामिछानेविरुद्ध दर्ता भएको ‘सम्पत्ति शुद्धीकरण’ तथा ‘सङ्गठित अपराध’ सम्बन्धी अभियोगपत्र संशोधन गर्ने निर्णय गरेकी थिइन्। उक्त निर्णय कानुनविपरीत भएको दाबी गर्दै सर्वोच्च अदालतमा रिट निवेदन दायर गरिएको हो।
रिट निवेदनमा अभियोगपत्र संशोधन तथा मुद्दा फिर्ता लिने निर्णयले कानुनी प्रक्रियामाथि प्रश्न उठाएको उल्लेख गरिएको छ। अदालतले अब माग गरिएका सक्कल कागजात अध्ययनपछि अन्तरिम आदेश जारी गर्ने वा नगर्ने विषयमा निर्णय गर्नेछ।