उत्सव खबर 
Raju Sah
बारा, ६ माघ- अख्तियार दुरुपयोग अनुसन्धान आयोगले बाराको पचरौता नगरपालिकामा जेष्ठ नागरिक सामाजिक सुरक्षा भत्ता दुरुपयोग भएको प्रकरणमा वडा अध्यक्षसहित सात जनाविरुद्ध विशेष अदालतमा आरोपपत्र दायर गरेको छ।
आयोगका अनुसार पचरौता नगरपालिका–६ का वडा अध्यक्ष मकबुल मियाँ अन्सारी, तत्कालीन वडा सचिवहरू संगिता घिमिरे, पिटर थारु र राजाराम प्रसाद साह तथा स्थानीय बासिन्दा साजुला मिया अन्सारी, रबेया अन्सारीन र उमत मिया अन्सारीले मिलेमतोमा उमेर नपुगेका व्यक्तिलाई जेष्ठ नागरिक सामाजिक सुरक्षा भत्ता दिलाएका थिए।
अख्तियारको अनुसन्धानमा वास्तविक जन्ममिति हुँदाहुँदै पनि नागरिकता तथा अन्य कागजातमा झुट्टा विवरण पेश गरी उमेर बढाएर भत्ता लिएको पुष्टि भएको जनाएको छ। यसरी गैरकानुनी रूपमा सरकारी कोषमा हानी नोक्सानी पुर्याई लाखौं रुपैयाँ बराबरको भत्ता लिएको प्रमाण फेला परेको आयोगको दाबी छ।
आयोगका अनुसार सामाजिक सुरक्षा नियमावली, २०७६ ले तोकेअनुसार निवेदन दर्ताका क्रममा आवश्यक प्रारम्भिक छानबिन नगरी वडा कार्यालयबाट गैरकानुनी रूपमा सिफारिस गरिएको थियो। वडा अध्यक्ष अन्सारीले जानाजानी उमेर नपुगेका व्यक्तिलाई जेष्ठ नागरिक भत्ता उपलब्ध गराउन सिफारिस गर्नुका साथै हरेक वर्ष नवीकरणसमेत गरिदिएको आरोप लगाइएको छ।
अख्तियारले वडा अध्यक्ष मकबुल मियाँ अन्सारीविरुद्ध ४ लाख ७६ हजार रुपैयाँ बिगो कायम गर्दै भ्रष्टाचार निवारण ऐन, २०५९ अनुसार कैद, जरिवाना तथा बिगो असुल उपरको मागदाबी गरेको छ। त्यस्तै, अन्य प्रतिवादीहरूमाथि पनि उनीहरूले लिएको भत्ता बराबरको बिगो कायम गरी कैद, जरिवाना र बिगो असुलको माग गरिएको आयोगका प्रवक्ता सुरेश न्यौपानेले जानकारी दिएका छन्।
