प्रतिनिधिसभा समानुपातिकतर्फ ८५ उम्मेदवारको नाम फिर्ता

93

काठमाडौँ, पुस २९ गते — प्रतिनिधिसभाको समानुपातिक निर्वाचन प्रणालीतर्फ बन्दसूचीमा नाम समावेश भएका विभिन्न राजनीतिक दलका ८५ जना उम्मेदवारले आफ्नो नाम फिर्ता लिएका छन्। निर्वाचन आयोगले सोमबार बिहान १० बजेदेखि अपराह्न ४ बजेसम्म नाम फिर्ता लिने व्यवस्था गरेको थियो।
आयोगका अनुसार समानुपातिकतर्फ बन्दसूची पेस गरेका राजनीतिक दलका उम्मेदवारले स्वयं उपस्थित भएर वा उपस्थित हुन नसकेको अवस्थामा वारेसमार्फत नाम फिर्ता लिन पाउने व्यवस्था गरिएको थियो। प्रतिनिधिसभाको निर्वाचन आगामी फागुन २१ गते हुने तय भएको छ।
नाम फिर्ता लिनेमा जनमत पार्टी, नेकपा (एमाले), जनता समाजवादी पार्टी, नेपाली कम्युनिष्ट पार्टी, प्रगतिशील लोकतान्त्रिक पार्टी, राष्ट्रिय प्रजातन्त्र पार्टी लगायतका राजनीतिक दलका उम्मेदवार रहेका छन्। विवरणअनुसार जनता समाजवादी पार्टीका २१ जना र जनमत पार्टीका २० जना उम्मेदवारले आफ्नो नाम फिर्ता लिएका छन्।
जनता समाजवादी पार्टी र लोकतान्त्रिक समाजवादी पार्टीबीच हालै एकता भएकाले बन्दसूची व्यवस्थापन गर्नका लागि केही उम्मेदवारको नाम फिर्ता लिइएको जनाइएको छ। आयोगले अन्तिम बन्दसूची सार्वजनिक हुँदा नाम फिर्ता लिने उम्मेदवारको संख्या थप हुन सक्ने स्पष्ट पारेको छ।
समानुपातिक निर्वाचन प्रणालीतर्फ कूल ६४ राजनीतिक दलले बन्दसूची पेस गरेका थिए। आयोगले यही पुस १३ र १४ गते बन्दसूची पेस गर्न समय दिएको थियो। कूल २७५ सदस्यीय प्रतिनिधिसभा मध्ये ११० जना समानुपातिक निर्वाचन प्रणाली र १६५ जना प्रत्यक्ष निर्वाचन प्रणाली मार्फत निर्वाचित हुने संवैधानिक व्यवस्था छ।