उत्सव खबर 
वीरगन्ज, १३ पुस- तराईमा चिसो बढेसंगै कठ्याङ्ग्रिदो जाडो र बाक्लो कुहिरोले जनजीवन प्रभावित भइरहेका बेला पर्साका विपन्न बस्तीमा प्रशासनले कम्बल वितरण गर्दै मानवीय पहल गरेको छ। पुस महिनाको जाडोमा ओढ्ने–ओछ्याउनेको अभावले वृद्धवृद्धा, बालबालिका तथा अशक्तहरू बढी प्रभावित भइरहेका बेला जिल्ला सुरक्षा समिति पर्साको आयोजनामा कम्बल वितरण गरिएको हो।
आइतबार बिहान बहुदरमाई नगरपालिका–४ स्थित डकैलाबहुअरी प्रहरी चौकीको प्राङ्गणमा आयोजित कार्यक्रममा प्रमुख जिल्ला अधिकारी भोला दाहालको नेतृत्वमा अतिविपन्न, दलित तथा सहाराविहीन परिवारलाई कम्बल वितरण गरिएको हो। कार्यक्रममा बहुदरमाई नगरपालिका वडा नं. ३ र ६ यस्तै जगरनाथपुर गाउँपालिका वडा नं. ६ का नागरिकहरू पनि कम्बल वितरण हुदा लाभान्वित भएका छन्।
कार्यक्रममा जिल्ला प्रहरी कार्यालय पर्साका प्रमुख प्रहरी उपरीक्षक सुदिपराज पाठक, सशस्त्र प्रहरी बलका स.प्र.ना.उ. शम्भु कटुवाल, इलाका प्रहरी कार्यालय पोखरियाका प्रहरी निरीक्षक प्रदीप पौडेल लगायतका सुरक्षाकर्मी तथा प्रशासनिक अधिकारीहरूको उपस्थिति रहेको थियो। अधिकारीहरूले स्वयं नागरिकका हातमा कम्बल थमाउँदै राज्यको उपस्थिति र उत्तरदायित्वको अनुभूति गराएका थिए।
करिब २२० जनाको सहभागिता रहेको कार्यक्रममा कम्बल प्राप्त गरेपछि स्थानीय वृद्धवृद्धाहरूले राहत महसुस गरेका थिए। एक वृद्ध लाभग्राहीले भने, “यो जाडोमा कसैले हेर्ला भन्ने लागेको थिएन, तर सरकार आफैँ घरदैलोमा आएर सहयोग गर्यो। अब रात केही न्यानो हुने भयो।”
प्रशासनले शीतलहरबाट नागरिकलाई सुरक्षित राख्न यस्ता मानवीय कार्यक्रमलाई निरन्तरता दिइने जनाएको छ। चिसो अझै केही समय रहने भए पनि यस अभियानले विपन्न बस्तीमा राज्य आफ्नो दुःखमा साथमा रहेको सन्देश प्रवाह गरेको स्थानीयवासीको भनाइ छ।
126