उत्सव खबर 
Raju Sah
काठमाडौं, २८ भदौ: चिनियाँ वैज्ञानिकहरूले चिकित्सा क्षेत्रमा ठूलो उपलब्धि हात पारेका छन्। उनीहरूले ‘बोन ०२’ नामक विश्वकै पहिलो बोन ग्लू विकास गरेका छन्, जसले भाँचिएको हड्डीलाई केवल २–३ मिनेटमै जोड्ने क्षमता राख्छ।
यो जैविक पदार्थ समुद्रमा शंख (ओइस्टर) ले ढुङ्गा र धारामा कसरी मजबुतसँग टाँसिन्छ भन्ने प्राकृतिक प्रक्रियाबाट प्रेरित भएर बनाइएको हो। अनुसन्धानकर्ता डा. लिन जियानफेङले ओइस्टरको यही विशेषताबाट हड्डीमा पनि प्रयोग गर्न सकिने निष्कर्ष निकालेका थिए।
बोन ग्लू पूर्णतया बायोडिग्रेडेबल छ, जसले ६ महिनाभित्र शरीरमै घुल्ने भएकाले धातु प्रत्यारोपण वा दोस्रो शल्यक्रियाको आवश्यकता पर्दैन। यसले २०० किलोग्रामभन्दा बढी टाँसिने शक्ति प्रदर्शन गर्छ र रगतले भरिएको वातावरणमै पनि मजबुत रूपमा काम गर्छ।
वैज्ञानिकहरूले ५० भन्दा बढी सूत्र परीक्षण र सयौं प्रयोगपछि यो सुरक्षित र प्रभावकारी ग्लू बनाउन सफल भएका हुन्।