उत्सव खबर 
काठमाडौं, साउन २ — पोखराको १३५ रोपनी जग्गा विवाद मिलाउन ३२ लाख रुपैयाँ घुस लिएको अडियो सार्वजनिक भएपछि भूमि व्यवस्था, सहकारी तथा गरिबी निवारणमन्त्री बलराम अधिकारी विवादमा तानिएका छन्। अडियोमा नाम आएका बिचौलिया सुजन लामासँग मन्त्रीले भेट भएको पुष्टि गरेका छन्। अनुसन्धानले सार्वजनिक गरेको अडियो अनुसार, मन्त्री अधिकारीले मालपोतको कर्मचारी मिलाउन ३२ लाख लिएको आरोप छ। मन्त्री अधिकारीले बिहीबार मन्त्रालयमा आयोजित पत्रकार सम्मेलनमा घुस नलिएको र अडियो चरित्र हत्या गर्ने उद्देश्यले सार्वजनिक गरिएको दाबी गरे। तर, कास्की मालपोत प्रमुख रामचन्द्र अधिकारीको सरुवा भएपछि सुजन लामा केही व्यक्तिसहित आफूलाई भेट्न आएको स्वीकार गरेका छन्। भूमि आयोग कास्की अध्यक्षमा खेमबहादुर पुनको नियुक्ति विषयमा भने छलफल नभएको मन्त्रीको दाबी छ। यसअघि सार्वजनिक अडियोमा तत्कालीन सामान्य प्रशासनमन्त्री राजकुमार गुप्ता, सांसद रञ्जिता श्रेष्ठ, सचिव अर्जुन पोखरेल र मन्त्री अधिकारीका छोरा मनोज अधिकारीको नाम समेत समेटिएको छ। अडियोमा मनोजले बाबुका लागि न्युजिल्यान्डबाट पैसा उठाउने र पोखरामा पैसा लिएको दाबी गरिएको छ। यस प्रकरणपछि गुप्ताले मन्त्री पदबाट राजीनामा गरिसकेका छन्।
उनले घूस प्रकरणमा मन्त्रालय र छोरालाई जोडेकोमा आपत्ति जनाउँदै त्यसमा आफ्नो कुनै सरोकार नभएको दाबी समेत गरेका थिए। अडियोमा न्युजिल्यान्डमा बस्ने मन्त्री अधिकारीका छोरा मनोज नेपाल बाबुको लागि पैसा उठाउने काम गर्ने गरेको र उनी पोखरा गएर पैसा लिएर रामचन्द्रको सरुवा गराएको दाबी गरिएको छ। सचिवले पाँच लाख घुस खाएको दाबी गरिएको छ भने अधिकारीले ३२ लाख र मन्त्री गुप्ताले ३५ लाख खाएको दाबी गरिएको छ। यस प्रकरणमा थप अनुसन्धान भइरहेको छ।